« Ես որքանով տեղյակ եմ նախագիծ դեռ չկա, բայց որքանով հասկացա մեզ ներկայացված հանրագրի հիման վրա տիկին Զոհրաբյանը և տիկին Իսայանը որոշել են քննարկման առարկա դարձնել այդ հարցը։ Ես չեմ կարող խոսել խմբակցության անունից, այսինքն խմբակցության դիրքորոշում չեմ կարող հայտնել։ Նախ, որովհետև լիազորված չեմ, երկրորդ հերթին խմբակցությունը դեռ չի քննարկել, բայց որքանով որ ես հասցրել եմ իմ գործընկերների հետ քննարկել այս հարցը, դիրքորոշում բնականաբար կտրուկ բացասական է, և ես կարծում եմ, որ մենք վաղուց Քարե դարից դուրս ենք եկել, և վաղուց անցել են այն ժամանակները, երբ իրեն քաղաքակիրթ համարող երկիրը կարող է նման հարց բերել օրակարգ։ Մենք բոլորս տեղյակ ենք, որ ժամանակին արգելված են եղել հղիության արհեստական ընդհատումները և նաև տեղյակ ենք, թե ինչ ողբերգական և վատ հետևանքների է այդ արգելքը հասցրել, որովհետև եթե դու արգելում ես հղիության արհեստական ընդհատումը, ապա դրանով ոչ թե պակասում է արհեստական ընդհատումների թիվը, այլ սկսում է զարգացնել սև շուկա, իսկ սև շուկայում առողջության պահպանմանն ուղղված քայլերը շատ աղքատիկ են լինում, և դրանից տուժում են կանայք» , – «Առաջին լրատվական»-իհետ զրույցում ասաց ԱԺ «Իմ քայլը» խմբակցության պատգամավոր Արուսյակ Ջուլհակյանը:
Հիշեցնենք, որ ԲՀԿ–ն շրջանառության մեջ է դնելու օրենքի նախագիծ, որով արգելվելու է հղիության արհեստական ընդհատումը, բացառությամբ որոշ դեպքերի, եթե բժիշկների ցուցումով կինն ունի այնպիսի առողջական խնդիրներ, որոնք անհամատեղելի են հղիության հետ։
