Համավարակով պայմանավորված սահմանափակումներն ի՞նչ վնաս հասցրին մշակութային ոլորտին: Մշակույթի ոլորտում սահմանափակումները վերանայվել են, թույլատրվել են բացօթյա համերգներն ու ներկայացումները. արդյո՞ք այս միջոցառումները աշխուժություն կբերեն ոլորտում: Թեմայի շուրջ «Առաջին լրատվական»-ը զրուցել է Գաբրիել Սունդուկյանի անվան ակադեմիական թատրոնի տնօրեն Վարդան Մկրտչյանի հետ: Նրա կարծիքով՝ համավարակով պայմանավորված խնդիրներն ավելի շատ հոգեբանական են:
«Դերասանի գործը նախ և առաջ ֆիզիկական աշխատանք է, պետք է միշտ «ֆորմայի» մեջ մնալ, հանդիսատեսի հետ հարաբերության մեջ լինել. այս առումով խնդիրներ առաջացան: Փորձեցինք բացը լրացնել առցանց ծրագրերի իրականացմամբ, բայց միևնույն է, դա չէր կարող փոխարինել իրականությանը, դա ստեղծեց մեկ այլ իրականություն, որը, կարծում եմ, իրեն սպառում է»,- նշեց մեր զրուցակիցը:
Վարդան Մկրտչյանը նկատեց, որ համավարակով պայմանավորված իրավիճակը յուրաքանչյուրիս մեր գործունեությունը վերանայելու, ավելի ճկուն լինելու, ռեզերվում տարբեր հարթակներ ու նախագծեր ունենալու և բնականոն կյանքից դուրս գործելու հնարավորություն տվեց. պետք է գնալ որոշակի փոփոխությունների:
Մեր զրուցակցի խոսքով՝ նոր ձևաչափով՝ բացօթյա ներկայացումներով աշխատանքը նոր շունչ կտա թե՛ թատրոնի աշխատակիցներին, և թե՛ հանդիսատեսին: «Սակայն բացօթյա ներկայացումներին մենք պատրաստ չենք, առաջ են գալիս գնումների հետ կապված խնդիրներ, շինարարական աշխատանքներ պետք է իրականացվեն, ինչը հաշվի չի առնված: Այս աշխատանքները ժամանակատար են»:
Վարդան Մկրտչյանը նաև կարծիք հայտնեց, որ համավարակը սպառեց սոցանցերում շատ ակտիվ լինելու պահանջը. «Կենդանի շփման պահանջը ավելի է մեծացել և հանդիսատեսի մեջ կենդանի շփման պահանջը ավելի է արժևորվել»:
Մանրամասն՝ տեսանյութում: