ԵՊՀ ուսանողական խորհուրդը հայտարարություն է տարածել, համաձայն որի՝ պատրաստվում են դիմել կառավարությանը՝ պահանջելու ուսանողների ուսման վարձավճարի մասնակի փոխհատուցում: Հայտարարության մեջ մասնավորապես ասված է․
«Հարգելի՛ ուսանողներ, ԵՊՀ ուսանողական խորհուրդը նախատեսում է դիմել ՀՀ կառավարությանը՝ պահանջելու ուսանողների ուսման վարձավճարի մասնակի փոխհատուցում: Հեռավար եղանակով կազմակերպվող դասապրոցեսի արդյունավետությունից մինչև երկրում տնտեսական ակտիվության անկում փաստում են, որ մեր պահանջը ավելի քան հիմնավոր է: Ուսանողական խորհուրդը կոչ է անում ՀՀ ուսանողությանը միանալ սույն նախաձեռնությանը և դառնալ իր օրինական շահերի իրավատերը»։
ԵՊՀ ուսանողական խորհուրդն այս պահանջով նաև ստորագրահավաք է կազմակերպել՝ կոչ անելով բոլոր ուսանողներին միանալ դրան։
ՀՀ կրթության, գիտության մշակույթի և սպորտի նախարարության մամուլի խոսնակ Օֆելյա Կամավոսյանը «Առաջին լրատվական»-ի հետ զրույցում հայտնեց, որ այս պահի դրությամբ ԵՊՀ ուսանողական խորհրդից որևէ գրություն չեն ստացել։
«Այդ խնդրի հասցեատերը նախարարության բուհերի վարչությունն է, որտեղ այս պահին որևէ դիմում չեն ստացել։ Հավանաբար, իրենք կառավարություն են դիմել, որտեղից էլ մեզ կփոխանցվի, բայց այս պահին ոչ մի դիմում չունենք։ Հենց դիմումը պաշտոնապես ունենանք, այդ ժամանակ կարող ենք մեկնաբանություն տալ»,- հայտնեց նախարարության խոսնակը։
Հիշեցնենք, որ Երևանի պետական համալսարանում վարձավճարները թանկացել են։ Այս տարի առաջին կուրսի ուսանողները 70-160 հազար դրամ ավելի պետք է վճարեն մայր բուհ ընդունվելու համար։ Եվ այս որոշումը կայացվել է՝ հաշվի չառնելով կորոնավիրուսային համավարակով պայմանավորված տնտեսական ճգնաժամը։ ԵՊՀ ռեկտորի պաշտոնակատար Գեղամ Գևորգյանը ասուլիսի ժամանակ, սակայն, հայտնել է, որ այս որոշումը կայացվել է դեռևս նախորդ տարվա հոկտեմբերին։
