ԲՀԿ նախագահ Գագիկ Ծառուկյանը շարունակում է իր ազդարարած մեծ հանրահավաքին ընդառաջ մարզային հանդիպումները և, ըստ ամենայնի, ընտրազանգվածի ծավալների ճշգրտումն ու տրամադրությունների շոշափումը, ընթացքում խաղալուց սոցիալական ականջահաճո կարգախոսների ավանդական բառամթերքով: Այդուհանդերձ, որքան ԲՀԿ նախագահը փորձում է ուժգնացնել սոցիալական հռետորաբանությունը, այնքան ժամանակի ընթացքում ակնառու է դառնում, որ նա, այդուհանդերձ, ավելի ու ավելի է առերեսման գնում Ռոբերտ Քոչարյանի քաղաքական դիրքավորման խնդրին: Թե՛ Ծառուկյանը, թե՛ Քոչարյանը, թե՛ Սերժ Սարգսյանը աշխուժացել են մեզ հետ սակարկելու ակնկալիքով, հարցազրույցներից մեկում արտահայտվել էր ԱԺ «Իմ քայլը» խմբակցության անդամ, խորհրդարանի փոխխոսնակ Ալեն Սիմոնյանը: Մեծ հաշվով, այդ սխեման արտացոլում է քաղաքական իրադրության տրամաբանությունը՝ անկախ այն հանգամանքից, թե որքան է «սակարկության» ակնկալիքի առումով հայտարարությունը ուղիղ կամ, բառի բուն իմաստով, իրականություն:
Այլ կերպ ասած, եթե չկա երեքի միասնական գործողություն՝ իսկ այդպիսի գործողություն չկա, քանի որ բացի շահերի բախումից, նրանք նաև շատ լավ են պատկերացնում զուտ տեղեկատվա-քարոզչական իմաստով միմյանց հետ կապակցվածության տեխնոլոգիական իմաստով կորստաբեր հանգամանքը, նրանք դառնում են մրցակիցներ, և այդ մրցակցության ելքն արդեն որոշում է իշխանության վարքագիծը, իշխանությունն է որոշում, թե ում հետ խաղա կամ, այլ կերպ ասած՝ «սակարկի»: Սակարկությունը տվյալ դեպքում հենց քաղաքական խաղի իմաստով, ոչ թե բանալ առևտրի, թեև պետք չէ բացառել թե՛ մեկը, թե՛ ներառյալ մյուսը: Տարբերակը, երբ իրականում միասին խաղում են երեքը, պարզապես մարտավարական նկատառումով առանձնացված, տեսականում, անշուշտ, գոյության իրավունքով, սակայն երևի թե թույլ տրամաբանությամբ տարբերակ է: Բանն այն է, որ երեք ուժերը չունեն այդպես խաղալու հիմնավոր շարժառիթ կամ պատճառ, որովհետև նրանք գործնականում խաղում են կորիզի իմաստով նույն համակարգի վրա, հետևաբար՝ բաց ռեժիմով միասնական խաղը նրանց ոչ թե վնաս, այլ հակառակը՝ ավելի արդյունավետ հեռանկար էր բերելու: Ըստ այդմ, նրանք չունեն «թաքնվելու» խնդիր, և առանձնացված գործողությունները պայմանավորված են հենց միմյանց հետ ունեցած խնդիրներով:
Լուսանկարը՝ Armeniasputnik-ի