Կորոնավիրուսի դեմ պայքարում հաջող արդյունքներ արձանագրած Վրաստանում համաճարակային իրավիճակը դուրս է գալիս վերահսկողությունից՝ աճում է մտահոգիչ վիճակագրությունը, ընդլայնվում է վարակի տարածման գոտին, հիվանդանոցներում առկա տեղերի քանակը մոտ է վերջանալուն:
Վրաստանի իշխանությունները չեն թաքցնում մտահոգությունը՝ ընդլայնվել է նաև վարակի տարածման ոլորտը. կորոնավիրուս է հաստատվել խորհրդարանի պատգամավորի և նրա կնոջ, երկու սահմանապահների, Բաթումի ծննդատան հինգ աշխատակիցների մոտ։
«Բազմազգ Վրաստան» նախաձեռնության ղեկավար Առնոլդ Ստեփանյանն «Առաջին լրատվական»-ի հետ զրույցում նշեց՝ վարակակիրների թիվը երկրաչափական սկզբունքով աճում է: «Եթե երեկ չէ առաջին օրը 57 դեպք էր, այսօր՝ 87։ Հիմնական պատճառը հասարակության զբոսաշրջային ակտիվությունն է։ Վարակի գլխավոր կենտրոնը Աջարիան է, որտեղ մարդկանց մեծ կուտակում կար։ Արևմտյան Վրաստանի մի քանի գյուղերում կարանտին է հայտարարվել, բայց ինչպես ասում են իշխանությունները՝ իրավիճակը վերահսկողության տակ է։ Եթե այսպես շարունակվի, ամենայն հավանականությամբ երկրորդ ալիքը մեծ թափ կհավաքի»,- նշեց մեր զրուցակիցը։
Առնոլդ Ստեփանյանի խոսքով՝ Վրաստանի էկոնոմիկայի նախարարն արդեն հայտարարել է, որ չեն լինի այնպիսի խիստ պատժամիջոցներ, ինչպես նախկինում եղան, որովհետև տնտեսությունը դրան չի դիմանա. «Կարծում եմ, որ իրավիճակը կզարգանա այնպես, ինչպես Եվրոպայում։ Ինչպես հասկանում ենք՝ Եվրոպայում ևս հրաժարվում են կոշտ սահմանափակումներից։ Առայժմ տեսանելի է, որ Վրաստանը ևս կգնա այդ ճանապարհով։ Նաև ուզում եմ նշել, որ առողջապահական համակարգն այժմ ավելի լավ է պատրաստված, քան մի քանի ամիս առաջ էր։ Ուստի, կառավարության խոսքով, այսպես կոչված՝ երկրորդ ալիքին երկիրն ավելի պատրաստ է»։
Վրաստանում արտակարգ դրություն այժմ չի գործում, սակայն Աջարիայում որոշ տեղեր հայտարարվել են կարմիր գոտի, ինչը նշանակում է, որ այնտեղ կանոններն ավելի խիստ են, քան ամբողջ Վրաստանում։
Արդյոք իրավիճակը որևէ կերպ կանդրադառնա՞ հոկտեմբերի 31-ին սպասվող խորհրդարանական ընտրությունների վրա՝ հարցին ի պատասխան մեր զրուցակիցը նշեց. «Վարչապետը հայտարարել է, որ այն սահմանափակումները, որ այժմ մտցվում են, չեն վերաբերելու նախընտրական միջոցառումներին, քաղաքական ուժերի քարոզարշավներին։ Այսինքն՝ առայժմ կանոնների խստացումը չի վերաբերում նախընտրական քարոզարշավին։ Իհարկե, իրավիճակը այս կամ այն կերպ ազդեցություն կունենա նախընտրական քարոզարշավի վրա, եթե ոչ՝ իշխանությունների, ապա գոնե հասարակության կողմից։ Հավանաբար ավելի մեծ զգուշավորություն կցուցաբերվի մեծ հավաքների նկատմամբ փակ տարածքներում, բայց կոնկրետ իշխանությունների կողմից սահմանափակումներ չկան։ Իմ դիտարկմամբ՝ եթե իրավիճակն այսպես լինի, ապա կհակվենք, այսպես կոչված, շվեդական մոդելին»։