Այն բանից հետո, երբ ԱԺ «Ժառանգության» պատգամավորներ Զարուհի Փոստանջյանի ու Ստյոպա Սաֆարյանի գլխավորությամբ «Վիշապների պուրակի» շրջակա տարածքների բնակիչները քանդեցին պուրակի ցանկապատերը, Բնապահպանության նախարար Արամ Հարությունյանը այցելեց պուրակ: Ըստ նախարարի տարածքում շինարարական աշխատանքներ իրականացնելու համար սեփականատերոջը անհրաժեշտ փաստաթղթերը թերի են: Մասնավորապես` տարածքը բնապահպանության նախարարության կողմից փորձաքննության չի ենթարվել, իսկ փորձաքննությունը ենթադրում է հասարակական լսումներ շրջակա բնակիչների մասնակցությամբ: Եվ թեև նախարարի ասելով՝ «պայմանավորվածություն էր ձեռք բերվել», որ տարածքում հետագա աշխատանքները դադարեցվելու են մինչև փորձաքննության անցկացումը, սակայն տարածքը կառուցապատող շինարարական ընկերությունը այսօր շարունակում էր աշխատանքները մինչև այն պահը, երբ բնակիչները քանդեցին ցանկապատերն ու սկսեցին հետ լցնել փորած հողերը: «Եթե մարդը դժգոհում է, հասարակությունը դժգոհում է, պետք չէ հակառակ գնալ»,- դիմեց նախարարը կառուցապատող ընկերության գործադիր տնօրեն Վոլոդյա Առուստամյանին: «Հիմա մենք կառուցապողին, Ձեզ առաջարկելու ենք և պահանջելու ենք, որ այս հետևանքները վերացնեք մինչև փորձաքննության ավարտը: Այսինքն` փորած հողը պետք է հետ լցնել: Մինչև միասնական փորձաքննությունը կատարվի»,- ասաց նախարարը: Նշենք նաև, որ «Առաջին լրատվականի» հետ զրույցում տարածքի բնակիչները նշեցին, որ այսօր ողջ օրվա ընթացքում բազմաթիվ հանցագործներ են այցելել տարածք ու փորձել ահաբեկել բնակիչներին: Այս հանցագործների գլխավորը ոմն «Մասիվի Սոս» քրեական տարրն է: