Սերբիայի նախագահ Ալեքսանդր Վուչիչը հայտարարել է, որ ՌԴ ղեկավար Վլադիմիր Պուտինը և ՌԴ արտգործնախարար Սերգեյ Լավրովը ներողություն են խնդրել Ռուսաստանի արտգործնախարարության պաշտոնական ներկայացուցիչ Մարիա Զախարովայի հրապարակման համար, որով նա մեկնաբանել էր սերբական պատվիրակության այցը Վաշինգտոն:
Ավելի վաղ Սերբիայի ղեկավարը հեռախոսազրույց էր ունեցել Պուտինի ու Լավրովի հետ:
Վուչիչը նշել է, որ Ռուսաստանի նախագահի հետ գերազանց զրույց է ունեցել։
«Կարծում եմ, որ Մարիա Զախարովայի անշրջահայաց գրառումից հետո Ռուսաստանի արձագանքից կարող եք տեսնել, թե ինչ հարգանք է տածում Ռուսաստանը անձամբ իմ և Սերբիայի հանդեպ», – ասել է Սերբիայի նախագահը:
Նրա խոսքով ՝ ՌԴ նախագահը և ՌԴ ԱԳՆ ղեկավարը երբեք իրենից ներողություն չեն խնդրել ինչ-որ բանի համար, բայց Զախարովայի գրառման պատճառով երկուսն էլ դա արել են:
Ավելի վաղ Սերբիայի պատվիրակությունը նախագահ Ալեքսանդր Վուչիչի գլխավորությամբ այցելել էր Վաշինգտոն, որտեղ հանդիպել էր ինքնահռչակ Կոսովոյի վարչապետ Ավդուլահ Հոթիի հետ, կողմերը տնտեսական համագործակցության մասին համաձայնագիր էին ստորագրել՝ ԱՄՆ նախագահ Դոնալդ Թրամփի միջնորդությամբ:
Սերբական լրատվամիջոցներում լուսանկար էր հայտնվել, որտեղ Վուչիչը նստած է աթոռի վրա՝ Թրամփի սեղանից հեռավորության վրա: Զախարովան նկարը մեկնաբանել է իր ֆեյսբուքյան էջում՝ տեղադրելով «Հիմնական բնազդը» ֆիլմից սքրինշոթ՝ հայտնի «ոտքը ոտքին» տեսարանով: