Այսօր ԱԺ անկախ պատգամավոր Արման Բաբաջանյանն այցելել էր Գեղարքունիքի մարզի Արտանիշ գյուղի միջնակարգ դպրոց, ծանոթացել դպրոցում առկա և լուծված խնդիրների հետ։ Ինչպես նշեց դպրոցի տնօրեն Արայիկ Մարգարյանը՝ անցյալ տարի գազաֆիկացրել էին դպրոցը, իսկ այս տարի էլ փոխել են դպրոցի պատուհանները։ Այնպես որ, դպրոցը հիմնականում պատրաստ է ուսումնական տարվան, սակայն կան մանր հարցեր, որոնք ընթացքում կլուծվեն։ ԱԺ պատգամավոր Արման Բաբաջանյանի այն հարցին, թե ինչքան երեխա ունեք այս տարի, դպրոցի տնօրենը պատասխանեց․ «Դպրոցում ունենք 80 երեխա, որից 6-ը՝ առաջին դասարանցի։ Նախորդ տարիների համեմատ երեխաների թիվը մի քիչ նվազել է»։ Դպրոցի տնօրենը նաև ասաց, որ այս պահի դրությամբ դպրոցում առաջնահերթ է տանիքի հետ կապված խնդիրը, ինչպես նաև մարզադահլիճի հարցը։
ԱԺ պատգամավոր Արման Բաբաջանյանի այն հարցին, թե հետագայում հարակից գյուղերի հաշվին կարո՞ղ է ավելանալ դպրոցականների թվաքանակը, տնօրենը պատասխանեց․ «Չեմ կարծում, որովհետև այդտեղ տրանսպորտի խնդիր կա, քանի որ միջգյուղական տրանսպորտ չի աշխատում»։ Զրուցելով դպրոցի անձնակազմի հետ, ԱԺ պատգամավոր Արման Բաբաջանյանը խնդրեց, որ նրանք հավաքագրեն ու կոնկրետ ներկայացնեն, թե ինչ է անհրաժեշտ դպրոցին, որպեսզի ինքն էլ պատկերացում կազմի ու տեսնի, թե հաջորդիվ ինչով կարող են օգնել դպրոցին։
Մանրամասները՝ տեսանյութում։