Այս պահին Վարդենիսի ընդհանուր իրավասության դատարանը շրջափակված է, և տարածքում լարված իրավիճակ է։ Դատարանում քննվող մի քրեական գործի շրջանակներում ամբաստանյալի հարազատները պահանջում են ազատ արձակել իրենց ազգականին, քանի որ նա մեղավոր չէ այն արարքում, ինչի մեջ մեղադրվում է։ Ամբաստանյալ Վահագն Մանուկյանի կինը՝ Դիանա Խաչատրյանն, «Առաջին լրատվական»-ի հետ զրույցում ասաց, որ իրենք փակել են դատարանի դռները և թույլ չեն տալու, որ դատավորն ու դատախազը դուրս գան դատարանի շենքից։ «Ի սկզբանե մենք գիտեինք, որ կեղծիք է եղել այս ամբողջ քրեական գործը։ Գործով վկան ազգությամբ ռուս էր ու Հայաստանում չէր։ Մենք մեր ուժերով գտել ենք, բերել ենք, և նա ցուցմունք է տվել, որ Վահագնը ոչ մի բանում մեղավոր չէ, բայց մեկ է՝ նրա ցուցմունքից հետո Վահագնին ուզում են 14 տարի դատապարտեն»,- ասաց ամբաստանյալի կինը։ «Մենք դատարանի դռները փակել ենք, չենք թողնում, որ ոչ ոք դուրս գա։ Մենք ուզում ենք, որ Փաշինյանը իմանա, որ անարդարություն է տեղի ունեցել»,- ասաց մեր զրուցակիցը։
Դեպքը տեղի է ունեցել տարիներ առաջ Վարդենիսի ոսկու հանքի տարածքում։ Ոսկու հանքի տարածքում կրակոցներ են հնչել, և գործով ամբաստանյալը ներկայումս մեղադրվում է հանքի անվտանգության աշխատողի վրա կրակելու համար։
Մինչդեռ, կնոջ խոսքերով՝ ցուցմունք տված վկան ասել է, որ զենքը Վահագնի ձեռքին չի եղել։ «Մենք պայքարելու ենք և պահանջելու ենք, որ արդարություն լինի, ու Վահագին թողնեն ազատության մեջ՝ մինչև դատավարությունը հասնի իր ավարտին։ Նա երկու անչափահաս երեխա ունի»,- եզրափակեց կինը՝ ավելացնելով, որ դեռ չգիտեն, թե դատարանի շենքը ինչքան են շրջափակած պահելու, քանի որ տարածքում մեծ քանակությամբ ոստիկանական ուժեր են կենտրոնացվում։
Լուսանկարը՝ Armlur.am-ի