Թուրքիան այլևս գործընկեր չէ Արևելյան Միջերկրականում: Այդ մասին հայտարարել է Ֆրանսիայի նախագահ Էմանուել Մակրոնը, ընդգծելով, որ Եվրոպայի ձայնն Անկարայի նկատմամբ պետք է լինի «ավելի միասնական և հստակ»։
«Պարզ է, որ Թուրքիան այլևս գործընկեր չէ այս տարածաշրջանում»,- հայտարարել է Մակրոնը՝ հանդես գալով Այաչոյում անցկացված մամուլի ասուլիսում։
Ֆրանսիայի ղեկավարն ընդգծել է, որ «Թուրքիան համաձայնագիր է ստորագրել Լիբիայի ազգային համաձայնության կառավարության հետ, որը մերժում է Հունաստանի օրինական իրավունքները»:
Մակրոնը նաև նշել է, որ «հորատման թուրքական մեթոդները Կիպրոսի բացառիկ տնտեսական գոտում անընդունելի են»: «Նա (Թուրքիան) ավելացնում է սադրանքները, որոնք վայել չեն մեծ պետությանը»,- հավելել է նա:
«Մենք՝ եվրոպացիներս, պետք է մեզ հստակ և ամուր պահենք ոչ թե թուրք ժողովրդի, այլ նախագահ Էրդողանի կառավարության նկատմամբ, որի գործելակերպն անընդունելի է։ Մեր կարմիր գծերը հասկանալի են. Եվրամիության բոլոր անդամ երկրների ինքնիշխանության հարգում, միջազգային իրավունքի հարգում, բոլոր միակողմանի գործողությունների դատապարտում: Մեր ցանկությունն է՝ խուսափել էսկալացիայի բոլոր տեսակներից: Թուրքիան այսօր պետք է պարզաբանի իր մտադրությունները»,- ասել Է Մակրոնը: