ԱՄՆ պետքարտուղար Մայք Պոմպեոն խոստովանել է, որ «մեծ է հավանականությունը», որ ռուսաստանյան ընդդիմադիր գործիչ Ալեքսեյ Նավալնիի թունավորման հետևում կանգնած են Ռուսաստանի բարձրաստիճան պաշտոնյաները, հաղորդում է Politico-ն:
Պոմպեոյի խոսքով, ԱՄՆ-ը զուգահեռաբար աշխատում է եվրոպական պետությունների հետ, գտնելու համար, թե ով է պատասխանատու նախագահ Վլադիմիր Պուտինի հայտնի քննադատին թունավորելու համար: Չնայած Պոմպեոն ուղղակիորեն մեղքը չի բարդում Ռուսաստանի կառավարության վրա, բայց չի բացառում նրա մասնակցությունը թունավորմանը:
Պոմպեոն ասել է, որ քաղաքական այլախոհներին թունավորելու փորձերը «սև բիծ» են դնում երկրների վրա:
«Ամբողջ աշխարհում մարդիկ տեսնում են այս տեսակի գործունեությունն այնպես, ինչպես որ կա: Եվ երբ տեսնում են այլախոհին թունավորելու փորձ, նրանք խոստովանում են. հավանականությունը մեծ է, որ դա իսկապես Ռուսաստանի բարձրաստիճան պաշտոնյաների ձեռքի գործն է: Կարծում եմ, որ դա լավ չէ Ռուսաստանի ժողովրդի համար: Կարծում եմ, դա լավ չէ Ռուսաստանի համար»,- ասել է պետքարտուղարը: