«Առաջին լրատվական»-ի զրուցակիցն է «Ազատամարտիկների դաշինքի» խորհրդի անդամ Ռազմիկ Պետրոսյանը։
– Պարոն Պետրոսյան, ՀՅԴ-ԲՀԿ-«Հայրենիք» եռյակը համագործակցում է, իրենց ասելով՝ օրակարգում այս իշխանությունների հրաժարականի հարցն է։ ԲՀԿ-ն նաև կրթական թեմայով հանրահավաք է նախաձեռնել։ Ի՞նչ դիտարկումներ ունեք այս ուժերի գործունեության շուրջ։
– Չգիտեմ՝ իրենց ակնկալիքները որոնք են, բայց միանշանակ է, որ ոչինչ էլ չի ստացվելու։ Ես միշտ նշել եմ, որ այն ուժերը, որոնց օրակարգում ընդդեմ գաղափարախոսությունն է, հաջողություն չեն կարող գրանցել։ Իրենք ծրագրերով էլ հանդես չեն գալիս։ Դաշնակցությունը, երեկվա իշխանության մաս կազմած ԿԳԲ-իշնիկը այսօր քաղաքականության մեջ է, բայց ես շատ կուզենայի, որ ԲՀԿ-ն նրանց մեջ չլիներ։ Ամեն դեպքում՝ հեռանկար չեմ տեսնում։ Իհարկե, այնպես չէ, որ իշխանությունը 100 տոկոսով ամեն ինչ լավ է անում, բնականաբար կան բացթողումներ, ու կարևոր է, որ այդ մասին բարձրաձայնի ընդդիմությունը։ Բայց դա այն ֆորմատը չէ, որ կարող է բացթողում բարձրաձայնել. իրենք անում են զուտ անելու համար, ոչ ավելին։
– Կարծում եք՝ այսօր կա՞ այնպիսի մի կրիտիկական զանգված, որ դեմ է իշխանություններին ու փողոց դուրս կգա։
– Կրիտիկական մասսա հաստատ չկա։ Մեր ժողովուրդը 20 տարի դիմացել է այն ամենին, ինչ իր գլխին բերել են նախկին իշխանությունները, ու լավ գիտի, որ 2 տարում այդ ամենը շտկել հնարավոր չէր։ Իհարկե, նրանք, ովքեր անմիջապես իրենց կաշվի վրա են ուզում փոփոխություններ տեսնել, դա չտեսնելով՝ մի փոքր հիասթափվում են։ Բայց ինչ վերաբերում է հարցին, որ նախկինները կարող են հետ գալ, ժողովուրդը հիշելու է՝ ում են ուզում հետ բերել, ու թույլ չի տալու։ Կարող է իշխանություններից շատ ավելին էինք սպասում, բայց մի շարք փոփոխություններ կատարվել են։ Տարբեր բնագավառներում բացթողումներ, չարաշահումներ էին, կան անելիքներ։ Առաջնային հարցերը լուծվում են, ամենագլխավոր բանը՝ մասսայական կազմակերպված պետական թալանը վերացել է, ու ժողովուրդը դա իր մաշկի վրա զգում է։ Բանակն այսօր արդիականացված զենքեր ունի, զինվորին կերակրելու ձևը փոխվել է, ճանապարհները սարքվում են, ամենակարևորը՝ վաղվա օրվա նկատմամբ հավատը վերականգնվել է։ Այնպես չէ, որ մենք նախկին իշխանությունների դեմ պայքարում էինք, որ մի կգ երշիկ ավելի ուտեինք, խնդիրը ստամոքսը չէ։ Խնդիրը մեր երեխաների վաղվա օրվա հանդեպ հույս ունենալն է։ Իհարկե, կան իշխանության մեջ մարդիկ, որոնք պետք է փոխվեն, բայց չմոռանանք, որ հիմնականում երիտասարդ կադրեր են, որոնք պետք է սովորեն։ Հաճախ կայքերը նայում եմ՝ որոշների հույսն էլի օտարներն են, պուտինները, բայց ավելի լավ է երիտասարդներ, քան օտարներ։ Նրանք, ովքեր մի քանի գրոշով կարող են նախկինների արածը մոռանալ, նրանց ծափահարել, հոգու խորքում գիտեն, որ նրանց վերադարձը կործանարար է մեր երկրի համար։
– Կարծում եք՝ որոշակի վտանգ կա միայն այդ երե՞ք ուժերից, թե՞ նաև նախկին նախագահներից։
– Ոչ մեկից էլ վտանգ լինել չի կարող, որովհետև ոչ մեկը ոչինչ անել չի կարող։ Ժողովուրդն արդեն մեկ անգամ իշխանություն է փոխել, նրա ձեռքից չես կարող իշխանություն խլել։ Ժողովուրդը Նիկոլին էլ, Ռազմիկին էլ կարող է փոխել, բայց նախկինների ճանապարհն այնպես է փակել, որ անվերադարձ գնացել են։ Նույնիսկ Նիկոլն էլ ասի՝ նախկիններին հետ բերեք, ժողովուրդը դա թույլ չի տալու։