Ամիսներ առաջ Միացյալ Նահանգներում մեկնարկեցին զարգացումներ, որոնք ունենալով տարբեր հիմք, զարգացան տարբեր տրամաբանության մեջ։ Նոյեմբերի 3-ին ընդառաջ, Միացյալ Նահանգներում այդ ընդվզումները, որոնք դեռ շարունակվում են, լոկալ ազդեցություններով զարգացումնե՞ր են, թե՞, այնուամենայնիվ, այս գործընթացները մասշտաբային են․ «Առաջին լրատվական»-ի հարցին միջազգայնագետ Սուրեն Սարգսյանը պատասխանեց․ «Ճիշտ եք նկատում, որ դիտարկումներից ամենակարևորագույնը կամ կարևորագույններից մեկը, անկյունաքարայինը՝ նոյեմբերի 3-ին կայանալիք նախագահական ընտրություններն են։ Բնականաբար, այս նախընտրական փուլը լարված է անցնում։ Երկու թեկնածուների համար էլ այս ընտրություններում հաղթելը կարևորագույն սկզբունք է, որովհետև սրանք ոչ միայն նախագահական ընտրություններ են, այլ դրանք այս բողոքի ակցիաների անկյունաքարային պահերից մեկն են լինելու։ Վերջին մի քանի ամիսների ընթացքում Միացյալ Նահանգներում տեղի են ունենում լուրջ անկարգություններ, այսպես ասած՝ հասարակական ցնցումներ, որոնց արդյունքում այնտեղ ձևավորվում են նոր իրողություններ, որոնք կապված են կուտակված մի շարք խնդիրների հետ՝ մարդու իրավունքների խնդիր, սոցիալական պրոբլեմներ։
Կորոնավիրուսի պատճառով, ինչպես շատ երկրներում, Միացյալ Նահանգներում նույնպես մարդիկ մնացել են տանը, չեն աշխատել, և այն, բնականաբար, լուրջ ազդեցությունն է ունեցել մարդկանց բարոյահոգեբանական վիճակի վրա։ Այս ամենին զուգահեռ, սևամորթ Ջորջ Ֆլոյդի սպանությունը լուրջ հարված էր նաև հասարակական այդ հուզումներին՝ այն առումով, որ հասարակական հուզումները դարձան լուրջ խնդիր թե՛ իշխանությունների, թե՛ տեղական իշխանությունների համար։ Այդ հասարակական հուզումները հետագայում ձեռք բերեցին խուլիգանական դրսևորումներ՝ համատարած թալան էր տեղի ունենում այնպիսի նահանգներում, ինչպիսին են Նյու Յորքը, Կալիֆոռնիան։ Ճիշտ է, սևամորթ Ջորջ Ֆլոյդի սպանությունը խթանող հանգամանք էր, բայց իրականում պատճառը շատ ավելի խոր ու տարբեր է»։
Մանրամասները՝ տեսանյութում։