Մալաթիա տոնավաճառի առևտրականները կանգնած են լուրջ խնդրի առաջ։ Հագուստի մաքսազերծման նոր օրենքի հետևանքով, շատ տնտեսվարողներ կդադարեցնեն իրենց գործունեությունը։ Ըստ նոր փոփոխություների՝ հագուստ ներկրողները մաքսազերծումն իրականացնելու են ոչ թե կիլոգրամով, այլ առանձին-առանձին։ Հետևաբար՝ բարձրանալու է մաքսատուրքերը։
Մալաթիա տոնավաճառում առևտրականները վրդովված են, վիրավորված իշխանություններից։ Ասում են մեր հացն են կտրում, մեր եկամուտը մեզանից խլում։ Տնտեսվարողները առանց այդ էլ կորոնավիրուսային համավարակով պայմանավորված քանի ամիս է չեն աշխատել։ Հիմա սկսել են աշխատել, սակայն առևտուր չկա, մարդիկ չեն կարող անգամ 5-6 հազար դրամանոց վերնաշապիկ գնել, ուր մնաց թանկ գնով։
«Նկարեք, շրջեք տեսեք՝ մարդ կա՞։ Ամբողջ օրը մնացել էստեղ, մարդ չեք գտնի։ Մարդիկ անգամ 4000 դրամ վերնաշապիկ չեն կարողանում գնել, ուր մնաց գների բարձրացում անենք։ Սա թալան է։ Եթե այսպես շարունակվի մենք պարզապես փակելու ենք գնանք։ Բայց ի՞նչ անենք, ինչպե՞ս մեր երեխաներին պահենք։ Թող այլընտրանք ստեղծեն, հետո նման որոշումներ ընդունեն»,- «Առաջին լրատվական»-ի հետ զրույցում միաձայն ասում են առևտրականները:
Նրանք նշում են, որ չի բացառվում՝ առաջիկայում իրենց բողոքի ձայնն ավելի մեծամասշտաբ ձևով կբարձրացնեն, քանի որ սա հարվածում է բոլորի գրպանին։
Մանրամասները՝ «Առաջին լրատվական»-ի տեսանյութում