Համավարակով պայմանավորված սահմանափակումներն ի՞նչ վնաս հասցրին մշակութային ոլորտին: Մշակույթի ոլորտում սահմանափակումները վերանայվել են, թույլատրվել են բացօթյա համերգներն ու ներկայացումները. արդյո՞ք այս միջոցառումները աշխուժություն կբերեն և կօգնեն հաղթահարել ճգնաժամը: Թեմայի շուրջ «Առաջին լրատվական»-ի հետ զրույցում ռեժիսոր Հրանտ Վարդանյանը նկատեց, որ մինչ կորոնավիրուսի համավարակն էլ մշակութային ոլորտը փայլուն վիճակում չէր. «Բայց շատ ուրախ եմ, որ սկսվել են նոր ներկայացումներ ու համերգներ՝ բաց տարածքներում, դա ողջունելի է: Ափսոս, որ ամառային կինոթատրոնների հարցը լուծված չէ»:
«Վստահությունը շատ կարևոր է, այն ձեռք բերելը դժվար է, կորցնելը՝ հեշտ: Երբ որ մարդկանց վստահությունը կորչում է, գործն առաջ չի գնում»,- նշեց ռեժիսորը: Անդրադառնալով հարցին, թե արդյոք այս ընթացքում խզվել է իշխանության և հասարակության միջև կապը՝ Հրանտ Վարդանյանը նշեց. «Կան չափանիշներ, որ կորել են, բաներ կան, որ թարս են, և չի կարելի ամեն ինչ այդքան ձգձգել, չի կարելի այդքան ծամել-ծամծմել պարզ բաները…
Ժողովուրդն իշխանությանը վստահեց և վստահում է, բայց բարձիթողի բաներ կան, բոլոր ոլորտներում բացերը շատ են, որոշ բաներ պետք է շտկել:
Օրինակ՝ կինոն ինձ համար շարժում է, բայց մենք էժան կրկես ենք ներկայացնում, դա արդեն թատրոն էլ չէ, էժան կրկես է: Մեր կինոյում այսօր գործողություն չկա, բոլորը միայն խոսում են: Արդեն գործողություններ են պետք, կինո պետք է ստեղծել»:
«Աշխարհում չկա իշխանություն, որին չպետք է քննադատել,- նշեց ռեժիսորը,- բայց քննադատելն էլ պետք է լինի ըստ էության և ճաշակով, ոչ թե պետք է զբաղվել բամբասանքով: Քննադատությունը պետք է ստեղծագործական լինի և առաջարկ ներկայացվի, թե ինչ անել»:
Մանրամասն՝ տեսանյութում: