«Առաջին լրատվական»-ի զրուցակիցն է Վրաստանի նախկին նախագահ Միխեիլ Սաակաշվիլու խորհրդական, հայտնի հասարակական-քաղաքական գործիչ Վան Բայբուրդը (Վրաստան, Թբիլիսի):
– Պարոն Բայբուրդ, Վրաստանում ուշագրավ ներքաղաքական պրոցեսներ են զարգանում։ Նախկին նախագահ Սաակաշվիլին հայտարարել է, որ պատրաստ է ընդդիմության հաղթանակի դեպքում երկու տարով ստանձնել վարչապետի պաշտոնը։ Ի՞նչ զարգացումներ են հնարավոր։
– Սաակաշվիլու հայտարարություններին Թբիլիսին հանգիստ է վերաբերվում։ Չեմ կարծում՝ շատ մեծ փոփոխություններ լինեն, բայց իր կողմնակիցների համար սա մի փոքր «դոպինգի» նման է։ Իհարկե, կլինի որոշակի ազդեցություն, բայց ոչ այնպիսին, որ իր կուսակցությունը մեծ հաջողության հասնի։ Հոկտեմբերի 31-ից հետո բոլորը կտեսնեն, որ այդ կուսակցությունը երևի կունենա, ինչպես իրենք են ասում, իրենց երկաթե 15-20 տոկոսը։
– Իսկ ինչպե՞ս են Վրաստանում վերաբերվում իր վերադարձի հնարավորությանը։
– Ինչպե՞ս պետք է վերաբերվեն։ Քանի որ ինքը դատապարտված է, ըստ Վրաստանի օրենքների` նրան պետք է բանտարկեն։ Բայց այդ դեպքում էլ մեծ իրարանցում կառաջանա։ Ես չեմ կարծում, որ ինքն այդ քայլին դիմի։
– Վրաստանի վարչապետ Գախարիան հայտարարել է, որ նրա վերադարձն ապակայունացում չի առաջացնի, բանտարկելու մասին որևէ խոսք չկա, հնարավո՞ր է՝ չբանտարկեն։
– Գիտեք ինչ՝ համաշխարհային քաղաքականության մեջ ոչ մի երկրում չի եղել այնպես, որ դատապարտված մարդը գա, բանտ չնստի ու հաջողության հասնի։ Ես չեմ կարծում, որ Վրաստանը դառնա առաջին երկիրը, անհնար է պատկերացնել, որ դա լինի։ Սա ավելի շուտ PR-ի հարց է, ինչպես նշեցի՝ իր կողմնակիցների համար «դոպինգի» նման մի բան։ 2012 թվականից մինչ այսօր իր կուսակցությունը ամեն մի խորհրդարանական, տեղական, նախագահական ընտրություններում զբաղեցնում է երկրորդ հորիզոնականը, եթե այս ընտրություններում տվյալները փոխվեն՝ նոր կարող ենք քննարկել։ Արդյոք կուսակցությունը կգնա՞ մարման, թե՞ կվաստակի իր 20 տոկոսը՝ պարզ կդառնա առաջիկայում։ 2020 թվականի այս ընտրությունները վերջ կտան բոլոր խոսակցություններին, կպարզենք՝ ունի՞ այդ կուսակցությունը ապագա, թե՞ ոչ։ Ասեմ, որ այն հաջողությունները, որոնք ունի «Վրացական երազանք» կուսակցությունը, խոսում են այն մասին, որ ժողովուրդը հավատում է այդ կուսակցությանը։ Շատ բան է արված։ Ես համարում եմ, որ «Վրացական երազանքի» հետ հավասար այսօր ոչ մի կուսակցություն չի մրցում։ Ես նորից եմ կրկնում՝ ժողովրդավարության մակարդակը «Վրացական երազանքը» հասցրեց ռեկորդային ցուցանիշների։ Չեն բանտարկվում ընդդիմության ներկայացուցիչներ, չկան ճնշումներ բիզնեսի նկատմամբ։ Սաակաշվիլու կուսակցության պարտության պատճառը երևի հենց դա էր՝ բանտերում դաժանությունները, բիզնեսի վրա ճնշումը։ Այսօր սյդ խոչընդոտները վերացվեցին։
– Բայց կան նաև հասարակ քաղաքացիներ, որոնք ուզում են նրա վերադարձը։
– Կան նաև Գամսախուրդիայի կողմնակիցներ, Շևարդնաձեի, իհարկե կան նաև Սաակաշվիլու կողմնակիցներ։ Եթե չլինեին այն դաժանությունները, որի պատճառով Սաակաշվիլու կուսակցությունը պարտվեց, ապա այսօր երևի ավելի շատ կլինեին իր կողմնակիցները։ Իհարկե, նրա օրոք շատ բան արվեց՝ ոստիկանության, ուժայինների, արդարադատության ոլորտում։ Բայց այդ լավ գործերի հետ միասին, հենց ինքն իր վերջին ելույթում խոստովանեց, որ արել է շատ սխալներ, որոնց համար և պատժվել է։ Իսկ քաղաքականությունն ընդհանրապես շատ է նման հրթիռի, որը բաց է թողնվում տիեզերք։ Ամեն մի կուսակցություն, գալով իշխանության, գործունեության տարբեր աստիճաններ ունի, ինչպես հրթիռը։ Ամեն մեկն էլ մի լավ բան անում է. եթե մենք դատենք այն գործերը, որ արել են վերջին իշխող կուսակցությունները, ապա այդ հրթիռները բավականին բարձր մակարդակի վրա են բարձրացվել։ Իհարկե, չենք կարող ասել Սաակաշվիլու օրոք ոչինչ չի արվել, իսկ այսօրվա իշխող ուժը՝ Բիձինա Իվանիշվիլու կուսակցությունը, բոլոր ոլորտներում այդ հրթիռը շատ բարձր մակարդակի վրա է բարձրացրել, համենայնդեպս ավելի բարձր, քան նախկին կուսակցությունները։ Ժողովուրդը դա զգում է իր մաշկի վրա։