ՆԱՏՕ-ի կենտրոնական գրասենյակում թուրք և հույն պաշտոնյաների բանակցություններն այն մասին, թե ինչպես խուսափել ռազմական էսկալացիայից Միջերկրական ծովի արևելյան հատվածում, հետաձգվել են երկու օրով՝ մինչև սեպտեմբերի 10-ը, հաղորդում է Reuters-ը:
Գործակալության տվյալներով, հանդիպումը հետաձգվել է Դաշինքի ռազմական կոմիտեի խնդրանքով:
ՆԱՏՕ-ի գլխավոր քարտուղար Յենս Սթոլթենբերգն անցած շաբաթ ասել է, որ Հունաստանը և Թուրքիան պայմանավորվել են բանակցել իրենց մայրցամաքային խութերի չափերի և Միջերկրական ծովում նավթի և գազի հնարավոր պաշարների հետ կապված պահանջների շուրջ:
Հունաստանը տարաձայնություններ ունի Թուրքիայի հետ մի շարք հարցերի շուրջ, մասնավորապես, դա վերաբերում է տարածաշրջանում ածխաջրածնային ռեսուրսների հետ կապված պահանջներին, որոնք հիմնված են մայրցամաքային խութերի երկարության վերաբերյալ հակասական պնդումների վրա:
Երկու երկրների միջև լարվածությունը սրվել է անցած ամիս այն բանից հետո, երբ թուրքական Oruc Reis նավը Միջերկրական ծովի վիճահարույց շրջաններում գազի և նավթի որոնողական աշխատանքներ է սկսել:
Անցած շաբաթ Թուրքիան հայտարարել է, որ նավը կշարունակի որոնողական աշխատանքները մինչև սեպտեմբերի 12-ը: