ԵԽԽՎ քաղաքական հանձնաժողովի այսօրվա վիրտուալ նիստում քննարկվեցին նաև Հայաստանին ուղղակիորեն և անուղղակիորեն առնչվող հարցեր, անդրադարձ կատարվեց նաև հայ-ադրբեջանական հարաբերությունների հուլիսյան սրացումներին, մեղադրանքներ հնչեցին Թուրքիայի հասցեին՝ վերջին շրջանի իրադարձություններում բացասական դերակատարման համար: Այս մասին «Առաջին լրատվական»-ի հետ զրույցում ասաց ԱԺ «Իմ քայլը» խմբակցության պատգամավոր Հովհաննես Իգիթյանը: Նա նաև հավելեց, որ հայկական պատվիրակությունը կարողանում է ներկայացնել եղելությունը: Պատգամավորի խոսքով՝ բոլոր լուրջ դիվանագետները, զեկուցողները գիտեն, որ Լեռնային Ղարաբաղը Հայաստանի կողմից օկուպացված տարածք չէ, այլ Լեռնային Ղարաբաղն ինքորոշվել է մինչև ՀՀ-ի անկախացումը՝ 1988թ.:
Անդրադառնալով մեկամսյա դադարից հետո վերսկսված Մարտի 1-ի գործով դատավարությանը, Հովհաննես Իգիթյանը նշեց, որ Ռ. Քոչարյանի շրջապատի հնարքները և խորամանկություններն արդեն հայտնի են: «Պարզ երևում է այն կեղծիքը, ինչով ապրում են այդ մարդիկ՝ սկսած կեղծ տեղեկանքներից… Հանկարծ պարզվում է, որ ՀՀ պաշտպանության նախկին նախարարը եղել է ՌԴ քաղաքացի, արդյո՞ք այդ մասին Ռ. Քոչարյանը, Ս. Սարգսյանը, ԱԱԾ-ն, պատգամավորները չգիտեին: Պարզվում է, որ վաղուց Ռուբեն Հայրապետյանն էլ է եղել ՌԴ քաղաքացի և խախտելով ՀՀ օրենքը՝ խորամանկությամբ ընտրվել է ԱԺ պատգամավոր: Չենք խոսում սեփականաշնորհումների մասին. այս մարդիկ սեփականաշնորհել են այնպիսի տարածքներ, որոնք արգելված է սեփականաշնորհել… Էլ չխոսենք ընտրակեղծիքների և ընտրակաշառքի մասին: Եվ այսօր նախկին այս համակարգը խոսում է ժողովրդավարությունից և իշխանությանը ժողովրդական ալիք բարձրացնելու սպառնալիք է տալիս… Ժողովուրդը գուցե մեզ չների, բայց նախիններին պատժելու է»,- նշեց Հովհաննես Իգիթյանը:
Արդարադատության նախարարն այսօր հայտարարել է, որ Մարտի 1-ի գործով արդարադատությունը ձգձգելու միտում կա: Անդրադառնալով այս դիտարկմանը՝ մեր զրուցակիցը նշեց, որ Ռոբերտ Քոչարյանի շրջապատը և փաստաբանները փորձում են ներկայացնել, թե նա որևէ կապ չունի Մարտի 1-ի հետ: «Բայց մեկ բան հաստատ է և առնվազն մեկ հարցի պատասխան կարող էր հստակ լինել, եթե դատավարությունը նորմալ հունով ընթանար: Եղել են և հայտնի են մարդիկ, որոնք վերջին կրակոցն իրականացրել են: Օրինակ՝ չորս ոստիկանի գործողությունների հետևանքով երեք մարդ է սպանվել, բայց հայտնի չէ՝ նրանցից ով ում է սպանել, և նրանք ազատության մեջ են: Նրանք պետք է պատասխանեն հարցին, թե արդյոք սպանելու գործողությանն ուղղված հրաման ստացել են, թե ոչ: Համոզված եմ, որ առանց հրամանի նրանք չէին կարող այդ բանն անել, առնվազն դա եղել է իրենց ղեկավար պաշտոնյայի հրաման՝ առնվազն ՆԳ նախարարի հրամանը, բայց նախարարն էլ չէր կարող այդպիսի հրաման տալ առանց վերևից ցուցում ստանալու:
Եվ բանակի դիպուկահարին արդյո՞ք որևէ մեկը հրահանգ է տվել սպանել, ոչ թե վիրավորել կամ օդ կրակել: Այս հարցի պատասխանը պետք իմանան և՛ տուժողների իրավահաջորդները, և մենք՝ քաղաքացիներս: Եվ փաստաբանները չպետք է խանգարեն, գլխավոր ամբաստանյալ Ռոբերտ Քոչարյանը պետք է պատասխանի այս հարցին՝ հրաման տվե՞լ ես այդ մարդկանց: Պարզ երևում է, որ Ռոբերտ Քոչարյանը շատ անօրինական բաներ է արել»:
Անդրադառնալով հարցին, թե արդյոք մեր դատական համակարգն ունակ է պարզել այս հարցերի պատասխանները, Հովհաննես Իգիթյանը նշեց, որ փորձում է լավատես լինել. «Թեժ աշուն պետք է լինի, ժամանակն է, որ դատական համակարգում բարեփոխումներն արդեն իրականություն դառնան»:
Մանրամասն՝ տեսանյութում: