Ամուլսարում կրքերը չեն հանդարտվում: Ամուլսարի պահապաններից Շիրակ Բունիաթյանն իր ֆեյսբուքյան էջում տեսանյութ է հրապարակել և հայտնել, որ «Լիդիան Արմենիա»-ի պահնորդները հարձակվել և ծեծի են եթարկել Ամուլսարի պահապաններին:
Նշվում է, որ պահնորդները դուրս են եկել իրենց տարածքից և հանրային տարածքում են հարձակում գործել: Ըստ ականատեսների՝ այդ հարձակումներից մի բաժին էլ հասել է տարածքում ծառայություն իրականացնող ոստիկաններին:
«Լիդիան Արմենիա»-ն հայտարարել է, որ քաղաքացիներն են քարերով հարձակվել պահնորդական խմբի վրա: Ի՞նչ է տեղի ունեցել իրականում:
Թեմայի շուրջ «Առաջին լրատվական»ը զրուցել է «Քաղաքացու որոշում» կուսակցության գործադիր մարմնի անդամ Միքայել Նահապետյանի և բնապահպան Լևոն Գալստյանի հետ:
Լևոն Գալստյանի խոսքով՝ քաղաքացիների և «Լիդիան»-ի պահնորդական խմբի միջև լարվածությունն ավելի քան երկու ամիս է շարունակվում է, անընդհատ տարբեր միջադեպեր են տեղի ունենում, որոնք կարող են բերել անկանխատեսելի հետևանքների: «Անընդհատ լարվածության մեջ պահելը համայնքի բնակիչներին և անընդհատ կոնֆլիկտներ ստեղծելը կողմերի միջև, լավ տեղ չի տանելու: Ես ականատես չեն եղել, բայց իրականությունն այն է, որ գիշերը տեղի է ունեցել վիճաբանություն երկու հոգու՝ Ամուլսարի պահապաններից մեկի և պահնորդներից մեկի միջև, որը վերածվել է քաշքշուկի: Դրան հաջորդել է այն, որ պահնորդները Ջերմուկի բնակչին ներս են տարել և 20-30 հոգով ծեծի են ենթարկել, նա ուշագնաց է եղել և մնացել այդ տարածքում: Օգնության են եկել երկու-երեք հոգի, նրանց էլ են ծեծի ենթարկել, նրանք հետ են քաշվել և օգնության են կանչել համայնքի բնակիչներին, որոնք եկել և ինչ-որ կերպ կարողացել են ուշաթափված քաղաքացուն տեղափոխել Ջերմուկ», նշեց Լևոն Գալստյանը: Բնապահպանը նաև ընդգծեց, որ սա լրջագույն խնդիր է, որը կարող է հանգեցնել անկանխատեսելի հետևանքների:
Միքայել Նահապետյանի դիտարկմամբ՝ «Լիդիան Արմենիա»-ի պահնորդական խմբի գործողությունները պատահականություն չեն, դրանց հիմքում ընկած է իրենց ինչպես պահելու վերաբերյալ պատվերը:«Վիճաբանությունը սկսվել է «բարևից». քաղաքացին բարևել է, բայց պահնորդները հրահանգ ունեն շփման չգնալու, և պահնորդը մեջքով է շրջվել… Սադրանքները կարող են տանել արյունահեղության»,- նշեց Միքայել Նահապետյանը՝ հավելելով, որ «Լիդիան Արմենիա»-ի պահնորդները վտանգ են ներկայացնում հանրային անվտանգության առումով:
Մանրամասն՝ տեսանյութում: