Բելառուսում տեղի ունեցող իրադարձություններին ակնդետ հետևում է միջազգային ամբողջ հանրությունը, այդ թվում՝ Հայաստանը: Պատճառների մասին խոսելն այստեղ թվում է ավելորդ: Դրանք բազմաթիվ են, այդ թվում և Հայաստանի համար: Դրանցից մեկն էլ այն է, որ Բելառուսը ոչ միայն ԵՏՄ անդամ է, այլ նաև Եվրամիության Արևելյան գործընկերության ծրագրի մասնակից պետություն: Այդ ծրագրին մասնակցում է նաև Հայաստանը:
ԵՄ Արևելյան գործընկերության ծրագրի շրջանակում է Հայաստանը 2017 թվականի նոյեմբերին կնքել Եվրամիության հետ համապարփակ համաձայնագիրը, որի վավերացման գործընթացը Եվրամիության երկրներում մոտենում է ավարտին: Իսկ ընդհանուր առմամբ ո՞ւր է հասել Արևելյան գործընկերության ծրագիրը: Բելառուսում ծավալվող զարգացումները առավել քան արդիական են դարձնում այդ հարցը, հատկապես Եվրամիության հարաբերական դիրքորոշման պայմաններում: Մասնավորապես, Եվրամիությունը կոչ է անում Լուկաշենկոյին լսել հանրությանը, միևնույն ժամանակ, սակայն, ձեռնպահ է մնում անձամբ նրա հանդեպ պատժամիջոց կիրառելուց, որպեսզի չկտրվի կապը Մինսկի հետ:
Մեծ հաշվով, Արևելյան գործընկերության ծրագրի անդամ վեց երկրներից երկուսի պարագայում տեղի է ունենում իրավիճակի հիմնարար, խորքային փոփոխություն: Եթե Բելառուսի պարագայում դա տեղի է ունենում, այսպես ասած, ընտրական գործընթացի ֆոնին, ընտրակեղծիքի դեմ հանրության բողոքի և իշխանության ուժային հակազդման, դրա ներքո ծավալվող աշխարհաքաղաքական շերտերի տեսքով, ապա մյուս անդամ երկրում՝ Ադրբեջանում, տեղի է ունենում այլ գործընթաց, սակայն մեծ հաշվով դրա բնույթն ու տրամաբանությունն այն են, որ Ադրբեջանը դառնում է Անկարայի կցորդը:
Այդ տրանսֆորմացիաները ինչ ազդեցություն են թողնելու ԵՄ Արևելյան գործընկերության ծրագրի ապագայի վրա, որն առանց այդ էլ լուսավոր ռեժիմում չէր: Եվրամիությունն ընդհանրապես հիշո՞ւմ է այդ ծրագիրը և ունի՞ դրա հետ կապված հեռանկարներ: Եթե այո, ապա տվյալ պարագայում ակնառու է, որ առաջանում է դրան թե՛ Բելառուսի, թե՛ Ադրբեջանի ներգրավվածության վերանայման առնվազն քննարկման անհրաժեշտություն:
Ավելին, եթե Բելառուսի պարագայում իրավիճակը դեռ անորոշ է, ապա Ադրբեջանի դեպքում ակնառու է, որ այդ երկիրը վերածվում է Եվրամիության հետ ագրեսիայի և շանտաժի լեզվով խոսող Էրդողանի քաղաքականության կցորդի, ինչն առնվազն տարօրինակ է դարձնում կա՛մ այդ կցորդի մասնակցությունը ԵՄ Արևելյան գործընկերությանը, կա՛մ Արևելյան գործընկերության ծրագիրը՝ այդ մասնակցության դեպքում:
