Ռուսաստանից ցամաքային ճանապարհով Հայաստան վերադառնալ ցանկացող ՀՀ քաղաքացիները երկար ժամանակ է՝ Լարսի անցակետում են գտնվում։ Այս պահին Լարսի անցակետ չհասած Չմի բնակավայրից մոտ 200 մետր հեռավորության վրա գտնվող բենզալցակայանի մոտ սեփական մեքենաների մեջ են գիշերում 23-25 մարդ, երկու երեխա, կանայք, տարեցներ, առողջական խնդիրներ ունեցող քաղաքացիներ։ Նրանք պնդում են, որ ՌԴ-ում ապրուստի միջոց չունեն, վարձով են բնակվել, աշխատանք չունեն, տուն չունեն, փողոցներում են մնացել։ Այդ իսկ պատճառով ցամաքային ճանապարհով որոշել են վերադառնալ Հայաստան։ Սակայն Վրաստանը ցամաքային հաղորդակցությունը դեռ չի վերականգնել, և հայտնի չէ, թե երբ դա տեղի կունենա։
«Առաջին լրատվական»-ը կապ հաստատեց Ռուսաստանի Դաշնությունում ՀՀ դեսպանության մաքսային կցորդ Արամ Թանանյանի հետ, ով մի քանի օր առաջ մեզ հետ զրույցում նշել էր, որ փորձում են ինչ-որ կերպ հարցին լուծում տալ և մեր քաղաքացիներին օգնել ինքնաթիռով վերադառնալ Հայաստան։ Նախորդ հրապարակման մեջ նշել էինք, որ Լարսում մնացած հայերի մեջ կան երեխաներ, կանայք, հաշմանդամություն ունեցող (կույր) քաղաքացի։
Թանանյանի փոխանցմամբ՝ հաշմանդամություն ունեցող քաղաքացուն, կնոջն ու երեխային տեղի գլխավոր հյուպատոսն իր միջոցներով աջակցել է ու տոմս ձեռք բերել և ուղարկել Հայաստան։ «Եվս երեք քաղաքացու՝ կին և երեխաներ, տոմսը այստեղի գործարարներից մեկն է խոստացել ձեռք բերել։ Քաղաքացիները սկսել են իրենց մեքենաները քարշակներով ուղարկել, որպեսզի հետագայում իրենք առաջին հնարավորության դեպքում ինքնաթիռով կամ այլ տարբերակով կարողանան հասնել Հայաստան։ Նախօրեին այստեղ մեր եկեղեցում մոտեցան ինձ, խնդրեցին, որ աջակցեմ ապրանքների ու մեքենայի տեղափոխման հետ կապված»,- տեղեկացրեց Արամ Թանանյանը։
Մեր զրուցակիցը նաև հայտնեց, որ ՌԴ Մաքսային ծառայության հետ պայմանավորվածություն է ձեռք բերել մեր քաղաքացիների մեքենաների ու իրերի մաքսազերծման հարցում փոքր-ինչ տարբերվող մոտեցում ցուցաբերել։ «Գիտեք, մի քիչ դժվար է մեքենաների և տան իրերի հետ կապված մաքսազերծման ընթացակարգը։ Հատուկ կարգեր չկան։ Դրա համար խնդրել եմ ընդառաջել և շատ բծախնդիր մոտեցում չցուցաբերել։ Կարող եմ ասել, որ գործընթացն ամբողջ ուղղություններով սկսվել է։ Մենք պարբերաբար տեղում ենք լինում, կապի մեջ ենք քաղաքացիների հետ»,- փոխանցեց Արամ Թանանյանը։
Պաշտոնյայի խոսքով՝ մեր քաղաքացիները ի վերջո հասկացան, որ անգամ եթե հազար հոգով էլ գան, ցամաքային սահմանը փակ է, ու դրա բացումը հայկական կողմից կախված չէ։ «Այո, մարդիկ հասկացան, որ անիմաստ է գալ ու այստեղ մնալ։ Գիտեք, շատերը ինձ զանգում շնորհակալություն են հայտնում, որ չեկան ու Լարսում չմնացին։ Ասում են՝ ինչ լավ արեցինք, որ ձեզ լսեցինք ու չեկանք»,- ասաց Թանանյանը և խոստացավ այլ մանրամասնություններ լինելու դեպքում անպայման տեղեկացնել։