Շիրակի պետական համալսարանի հոգաբարձուների խորհրդի նախագահ Լևոն Բարսեղյանը նախօրեին իր զարմանքն էր հայտնել համալսարանում հայտնաբերված չարաշահումների վերաբերյալ քրեական գործերի քննության ընթացքի վերաբերյալ։
Հիշեցնենք, որ դեռևս անցած տարի ՇՊՀ-ում իրականացված ստուգումների ժամանակ չարաշահումներ էին հայտնաբերվել, որոնց հիման վրա քրեական գործեր էին հարուցվել, հետո այդ գործերը միավորվեցին մեկ վարույթում, սակայն այդ գործերով քննությունը դոփում է տեղում։ «էս ի՞նչ վարք ու վերաբերմունք է: Սա Հայաստանի մի փոքրիկ համալսարանի տասնյակ քրգործերով հետաքննություն է կոչվում, ինչ Մարտի 1, ինչ Հոկտեմբերի 27, ինչ գազի ստրկական պայմանագիր, ինչ բան… Պատկերացնո՞ւմ եք՝ համալսարանական վարչական կոռուպցիայի գործերով այսպիսի ճահճում դեգերողները ոնց են ավելի բարդ գործերը քննում: Չէ, ինչ սաբոտաժ, ուղղակի մարդիկ աշխատում են: Գործ է՝ անում են, էլի: Ո՛չ ես, ո՛չ հոգաբարձուներից որևէ մեկը, ո՛չ խորհուրդը, ո՛չ համալսարանի աշխատակազմը լիազորություն չունենք քննչական և դատախազական գործեր անելու, անենք՝ կլինի ինքնիրավչություն, լիազորության անցում: Ով պիտի անի, կներեք արտահայտությանս համար: Կարո՞ղ է գործը էն քննիչներին պիտի տալ, որոնք իմ ու խորհրդի դեմ մուտիլովկեքը, որպես հանցագործության մասին հաղորդում ստանալուց 10-12 րոպե հետո գտնում են ինձ ու մյուս հոգաբարձուներին, 13-18 րոպեից հրավիրում հարցաքննության, 3 ժամ հարցաքննում են ու… հասկանում են, որ հանցակազմ չկար: Էդ արագագործ քննիչներից չկա՞ն ՀՔԾ-ում, չեմ հասկանում»,- գրել է Բարսեղյանը։
Շիրակի պետհամալսարանում տիրող վիճակի, չարաշահումների ու քրեական գործերի մասին բարձրաձայնող ՇՊՀ դասախոս Գագիկ Համբարյանն, «Առաջին լրատվական»-ի հետ զրույցում անդրադառնալով քրեական գործին, նկատեց, որ բոլոր քրեական գործերը մեկ վարույթում հավաքելն ու նման դանդաղկոտության մեջ հստակ միտում է տեսնում։ Նրա խոսքերով՝ ոչ մի կերպ չէր կարելի բոլոր քրեական գործերը միավորել մեկ վարույթում և ամբողջ գործերն ուղարկել ՀՔԾ։ «Ես ի սկզբանե ասել եմ, որ այս գործի հետևում կանգնած են շատ հզոր մարդիկ՝ թե՛ նախորդ իշխանության ներկայացուցիչներից և թե՛ ներկաներից։ Նրանք ամեն ինչ անում են, որպեսզի գործը չբացահայտվի կամ, ինչպես Լևոն Բարսեղյանն է ասում՝ միտում կա ձգելու այնքան, որ որոշ քրեական գործերի վերաբերյալ ժամկետները անցնեն, և գործը չհասնի դատարան։ Ինչու ամբողջ գործն ուղարկեցին ՀՔԾ։ Ինչ կապ ունի ՀՔԾ-ն կեղծ լիցենզիաներով պետական ծրագրերի մատուցման հետ, ինչ կապ ունի ՀՔԾ-ն 14 միլիոն դրամով նախկին ռեկտորի կողմից դիզելային գեներատոր գնելու հետ։ Ինչ կապ ունի ՀՔԾ-ն այն խնդրի հետ, որ 1.5 միլիոն դրամի փոխարեն նախկին ռեկտոր Սահակ Մինասյանը՝ ՀՀԿ-ի հետ փոխկապակցված, Հայաստանի երիտասարդական հիմնադրամին է փոխանցել 6 միլիոն դրամ՝ առանց որևէ բացատրության։ Ինչ կապ ունի ՀՔԾ-ն Շիրակի պետհամալսարանի գրադարանի գրքերի ոչնչացման հետ։ Ես, որքան գիտեմ՝ ՀՔԾ-ն քննում է պաշտոնատար անձանց վերաբերյալ քրեական գործեր։ Հիմա ինչո՞ւ են իմ այս բոլոր թվարկած գործերը միավորել Վարդևան Գրիգորյանի գործի հետ և տարել պառկեցրել ՀՔԾ-ում։ Ինչքան կարելի է լկտիաբար ծածկադմբոց անել ամեն ինչ»,- զարմանքով արձանագրում է Համբարյանը։
Նրա խոսքերով՝ ըստ Շիրակի պետհամալսարանում տարածված լուրերի՝ քաղաքագիտություն բաժինը բացելու համար նախկին ռեկտոր Սահակ Մինասյանը լիցենզիա ստանալու համար կեղծել է փաստաթղթերը և ՇՊՀ աշխատակից և դասավանդող դասախոս է գրել քաղաքագետ Լևոն Շիրինյանի անունը։ «Հիմա ինձ հետաքրքիր է, թե ՀՔԾ-ն քանի տարի պետք է քննի, որ պարզվի՝ Լևոն Շիրինյանը Շիրակի պետհամալսարանում երբևիցե չի դասավանդել անգամ հրավիրյալ դասախոսի կարգավիճակում»,- ասաց դասախոսը՝ հավելելով, որ նույնն է նաև դիզելային գեներատորի գործը։ Հասկանալի չէ, թե ՀՔԾ-ին որքան ժամանակ է պետք՝ պարզելու՝ այդ գեներատորն ինչ արժի։ Նույնը նաև գրադարանի գրքերի ոչնչացման պատմությունն է, երբ Սահակ Մինասյանը գրքերը հանձնել է մակուլատուրա, իսկ դրա վերաբերյալ նախարարությանը և այլ պատկան մարմինների կեղծ փաստաթղթեր է տրամադրել։ «Այս բոլոր գործերով մի քանի րոպե ժամանակ է պետք դրանք բացահայտելու համար։ Իսկ եթե դա չի արվում, ապա ես միտում եմ տեսնում։ Նախկինում Շիրակի պետհամալսարանի նախկին ռեկտոր Սահակ Մինասյանը հպարտանում էր Սերժ Սարգսյանի հետ իր կապերով։ Նա Շիրակի պետհամալսարանի կոլեկտիվի հետ առաջին հանդիպմանը գլուխ գովեց, որ իր ձեռքերը շատ երկար են, ու իր հովանավորները Բաղրամյան 26-ում են։ Իսկ հեղափոխությունից հետո նա բացահայտ նշում էր, որ բազմաթիվ ընկերներ ունի նաև ՔՊ-ականների մեջ։ Այն, ինչ հիմա տեղի է ունենում Շիրակի մարզի դատախազությունում այդ գործով ծածկադմբոց անելու հետ կապված, հետո գործը ՀՔԾ տանելով՝ պարզ հուշում է, որ այս իշխանություններին բացարձակ չի հետաքրքրում ո՛չ այս քրեական գործերի ճակատագիրը, ո՛չ էլ Շիրակի պետհամալսարանի ճակատագիրը։ Արդեն երրորդ անգամ է՝ ապրանքագիտական փորձաքննություն է կատարվում Շիրակի պետհամալսարանում։ Կրկին ոչ մի արդյունք։ Սա է իրականությունը»,- ընդգծեց Համբարյանը՝ ավելացնելով, որ ակնհայտ է, որ այս նոր իշխանություններն էլ չեն ցանկանում Շիրակի մարզի ՀՀԿ կառույցի ղեկավար Սահակ Մինասյանին «նեղացնել», այլապես նրա վերաբերյալ երկու այլ քրեական գործերով գոնե առաջխաղացում կլիներ։ Այդ գործերից մեկը, օրինակ, վերաբերում է Արթիկում երկու դպրոցի տարածքի վաճառքին։ Այս գործերով կրկին քննությունը դոփում է տեղում։
