Սեպտեմբերի 11-ից հետո Հայաստանում արտակարգ դրության ռեժիմը կհանվի, որին կփոխարինի կարանտինը: Արտակարգ ռեժիմի չեղարկումը նաև ընդդիմության պահանջն էր, ընդդիմությունը պահանջում էր չեղարկել արտակարգ դրությունը, որպեսզի հնարավորություն ունենա հանրահավաքներ իրականացնել: Այդ իրավունքն այսօր արդեն ապահովված է. ով և ինչպես կարող է օգտվել քաղաքական կյանքի այդ ազատականացումից: Թեմայի շուրջ «Առաջին լրատվական»-ի հետ քննարկմանը մասնակցեցին «Իմ քայլը» խմբակցության պատգամավոր Միքայել Զոլյանը և վերլուծաբան Արեգ Քոչինյանը:
Ի՞նչը կարող է խթանել հայաստանյան ներքաղաքական կյանքը: Արեգ Քոչինյանը, դիտարկելով դրական օրակարգի մեջ ընթացող գործընթացները, կարևորեց նոր քաղաքական ուժերի ձևավորումը, որոնք խոստումնալից են և կարող են կուսակցությունների վերածվել և լցնել ընդդիմության վաակումային դաշտը: Վերլուծաբանի խոսքով՝ այսօր քաղաքական դաշտում որպես ընդդիմություն ներկայացող ուժերից ոչ մեկը քաղաքական ուժ չէ: «Ամենակարևոր գործընթացը, որը կնպաստի Հայաստանում ներքաղաքական իրավիճակի ճահճացումից ազատմանը, նոր որակի քաղաքական ուժերի ձևավորումն է»,- ընդգծեց վերլուծաբանը՝ հավելելով, որ այստեղ անելիք չունեն ո՛չ իշխանությունը, ո՛չ ընդդիմություն հորջորջվող ուժերը:
Հարցին, թե ովքեր են իշխանությունից դժգոհողները, Միքայել Զոլյանը նշեց, որ նրանք հիմնականում երկու անհավասար խմբի են բաժանված: «Կա փոքր մի խումբ, որը դժգոհ է իշխանությունից, քանի որ իշխանությունը հեղափոխական է և իրականացնում է հեղափոխության նպատակներն ու արժեքները… Այս խումբը փարձում է լուծել արդարադատությունից խուսափելու խնդիր և զբաղվում է քաղաքականության իմիտացիայով… Նախկին իշխանական էլիտան, որը զրկվել է իշխանական լծակներից, իր փողի և մեդիառեսուրսների միջոցով փորձում է կեղծ քաղաքական պրոյեկտներ ստեղծել, ֆեյքնյուզ տարածել, և քանի որ իրենք վարկաբեկված են, չեն կարող իրենց անունից հանդես գալ, ստեղծում են փոքր խմբեր և ցույցեր են կազմակերպում. դա քաղաքականության իմիտացիա է և անհետաքրքիր է: Իշխանությանը իսկական ընդդիմություն է պետք, որն այլընտրանքային կարծիքներ կներկայացներ և որի հետ բանավեճեր կառաջանային»,- նշեց պատգամավորը:
Մյուս, ավելի մեծ խումբը, որը կառուցողական է, կողմնակից է հեղափոխությանը, բայց դժգոհում է բարեփոխումների դանդաղ տեմպից. «Դժգոհ են, որ որոշ կոռումպացված պաշտոնյաներ դեռ «նստած» չեն, որոշ պալատներ դեռ վերադարձված չեն ժողովրդին և այլն: Այսպիսի դժգոհությունը լեգիտիմ է և օգնում է, որ առաջ գնանք»:
Արեգ Քոչինյանը հավելեց, որ կեղծ ընդդիմությունը նպատակ ունի խուսափել արդարադատությունից և անվերջ հարվածներ հասցնել իշխանությանը՝ թուլացնելով նրա լեգիտիմությունը:
Մանրամասն՝ տեսանյութում: