Դատավորների ընդհանուր ժողովի հաշվիչ հանձնաժողովի ոչ պրոֆեսիոնալ աշխատանքի պատճառով կամ դրա կազմակերպչական ոչ լավ աշխատանքի պատճառով ստվերվեց Դատավորների ընդհանուր ժողովը, որտեղ առաջադրվեց Սահմանադրական դատարանի թեկնածուն։ Ինչպիսի՞ն են ձեր դիտարկումներն այս մասով․ «Առաջին լրատվական»-ի հարցին Տավուշի մարզի առաջին ատյանի ընդհանուր իրավասության դատարանի նախագահ Արման Կուրեխյանը պատասխանեց․ «Ես ձեռնպահ կմնայի հանձնաժողովի աշխատանքին գնահատական տալուց։ Անձամբ ճանաչում եմ հանձնաժողովի բոլոր անդամներին՝ բոլորն էլ բանիմաց, երկարամյա փորձով դատավորներ են, և ես չեմ կարծում, որ այդ թերությունները պայմանավորված են եղել նրանց կատարած աշխատանքով։
Ինչ վերաբերվում է ընտրությունների ընթացքին, ապա ես մի առիթով էլ ասել եմ՝ այդ խոսակցությունների հիմնական պատճառն այն էր, որ ժողովը փակ ռեժիմով անցկացվեց, ինչը մեր հասարակության համար այլևս ընդունելի չէ։ Քվեարկությունը նույնպես տեղի ունեցավ ԶԼՄ-ների բացակայության պարագայում․ թեև քվեարկությունը փակ գաղտնի է, սակայն այն լուսաբանելու որևիցե միջոց չկար։ Այս ամենը պետք է որ տեղիք տար նման լուրերի։ Պետք է նշեմ, որ ես ինքս, որպես Սահմանադրական դատարանի թեկնածու, նույնպես մասնակցել եմ այդ քվեարկությանը։ Ընտրություններից անմիջապես հետո դիմել էի ընտրությունների վերաբերյալ արձանագրությունը և դրան մասնակցած անձանց ցուցակները ստանալու նպատակով։ Զարմանալի էր ինձ համար, բայց ստացա շուրջ մեկ ամիս ուշացումով։ Թե ինչն էր ուշացման պատճառը, ես հիմա չեմ կարող նշել, որովհետև, իրոք, տեղյակ չեմ։ Իմ գործընկերներից կան մարդիկ, որոնք կարծում են, որ այդ ընթացքում փաստաթղթային ինչ-որ շտկումներ են իրականացվել, մյուս մասն էլ կարծում է, որ դրանով փորձ է արվել ստվերել ընտրությունների ընթացքը։ Ես ինքս հակված եմ և կուզեի, որ դա պայմանավորված լիներ մեր դատական դեպարտամենտի աշխատաոճով»։