Շվեդիայի Կարոլինայի համալսարանի գիտնականները հայտնաբերել են փոքր չեզոքացնող հակամարմին (նանոմարմին), որը կարող է արգելափակել SARS-CoV-2 կորոնավիրուսի մուտքը մարդու բջիջներ: Մասնագետները կարծում են, որ այն կարող է օգտագործվել որպես պաշտպանիչ միջոց վիրուսով վարակվելու դեմ՝ կանխելով COVID-19- ի ծանր զարգացումը: Այս մասին հաղորդվում է Nature Communications ամսագրում հրապարակված հոդվածում:
Հետազոտության ընթացքում մասնագետները ալպակայի օրգանիզմ են ներմուծել կորոնավիրուսի S-սպիտակուցը: 60 օր անց կենդանիների արյան նմուշներում նկատվել է ուժեղ իմունային պատասխան S-սպիտակուցի դեմ: Այնուհետև գիտնականները մեկուսացրել և կլոնավորել են չեզոքացնող հակամարմինները, որից հետո պարզել են դրանց կառուցվածքը`հետագայում SARS-CoV-2-ի դեմ արդյունավետությունը գնահատելու համար: Պարզվել է, որ Ty1 հակամարմինը արդյունավետորեն չեզոքացնում է վիրուսը՝ կցվելով սպիտակուցի ելուստի այն հատվածին, որը կապվում է ACE2 ռեցեպտորի հետ:
Նանոմարմինները մի քանի առավելություն ունեն սովորական հակամարմինների համեմատ: Դրանք սովորական հակամարմինների մեկ տասներորդականից էլ պակաս չափ ունեն և, որպես կանոն, նրանք ավելի հեշտ են արտադրվում մեծ քանակությամբ:
Գիտնականներն այժմ անցել են կենդանիների վրա նախակլինիկական հետազոտություններին՝ կենդանական մոդելի վրա Ty1-ի չեզոքացնող ներգործությունն ու բուժական ներուժն ուսումնասիրելու համար:
