Թուրքիայի նախագահ Ռեջեփ Էրդողանը Եվրախորհրդի ղեկավար Շարռլ Միշելի հետ հեռախոսազրույցի ընթացքում Եվրամիությանը կոչ է արել արդար և անկողմնակալ լինել Արևելյան Միջերկրական ծովում իրադրությունը կարգավորելու հարցում:
Ինչպես նշվում է Թուրքիայի նախագահի գրասենյակի հայտարարության մեջ, Էրդողանն ընդգծել է, որ սադրիչ խոսքերը, ինչպես նաև տարածաշրջանային խնդիրների վերաբերյալ եվրոպացի քաղաքական գործիչների քայլերը չեն օգնի առկա իրավիճակի կարգավորմանը: Միևնույն ժամանակ, ԵՄ վերաբերմունքը Արևելյան Միջերկրական ծովի նկատմամբ «անկեղծության փորձություն կդառնա միջազգային իրավունքի և տարածաշրջանային խաղաղության տեսանկյունից»:
Արևելյան Միջերկրական ծովում վերջերս լարվածությունն աճել է Աթենքի և Անկարայի միջև: Պատճառն այն է, որ Թուրքիան երկրաբանահետախուզական աշխատանքներ է իրականացնում այն տարածքում, որը Հունաստանն իր տնտեսական գոտին է համարում:
