Ստամբուլի «Ժամանակ» օրաթերթի գլխավոր խմբագիր Արա Գոչունյանը, մեկնաբանելով Թուրքիայի կառավարության՝ հայկական «Ակօս», «Նոր Մարմարա», «Ժամանակ» թերթերին ֆինանսապես աջակցելու մտադրությունը, «Առաջին լրատվականի» հետ զրույցում ասաց, որ «դա օժանդակություն չէ ու այս պահի դրությամբ դեռ վաղ է դրա մասին խոսելը»:
«Նախընթաց է ձևավորվել, որ պետական լծակների պաշտոնական հայտարարությունները որպես գովազդ տրվում են տպագիր մամուլին: Հանրապետական շրջանում կար մի ժամանակ, որ համահավասար ձևով այդ գովազդները երկրի փոքրամասնությունների թերթերին էլ էին տրամադրվում, բայց շուրջ 30 տարի է, ինչ դա ընդհատվել է»,- ասաց Ա. Գոչունյանը՝ նշելով, որ ներկայում կա մտադրություն, որ առանձին գերատեսչության կողմից տրվող այդ գովազդները տրվեն նաև փոքրամասնական թերթերին, ընդ որում՝ հարցը չի վերաբերում միայն հայկական թերթերին:
Նրա խոսքով, մի քանի օր առաջ փոքրամասնությունների ղեկավարները համապատասխան գերատեսչության ղեկավարի մոտ հրավիրվել են խորհրդակցության, ով լսել է փոքրամասնական թերթերի ղեկավարներին և ասել, որ «այդ մոտեցումների լույսի տակ պիտի կողմնորոշվեն՝ այդ գովազդները երկրի փոքրամասնական թերթերում պիտի դրվե՞ն, թե՞ ոչ»:
Հարցին, թե արդյոք սա Թուրքիայի կողմից Եվրամիությանը հաճոյանալու ձև չէ, Արա Գոչունյանը պատասխանեց, թե սա այն խնդիրը չէ, որ դասվի Եվրամիության առջև Թուրքիայի ստանձնած պարտավորությունների թվին, այլ առնչվում է ավելի շատ երկրի դեմոկրատացման գործընթացներին: «Թուրքիայում մամուլի ազատության, բազմակարծության խնդիրները օրակարգային են: Այդ ամբողջի մեջ, բնականաբար, երկրի փոքրամասնությունների մամուլի հետ այսպիսի աշխատանքը սերտացնելու պատրաստակամությունը պետք է դիտարկել դրական դիվիդենտներ ապահովելու տեսանկունից»,- ասաց նա՝ նշելով, որ խնդիրը պետք է դիտարկել այս հարթության վրա:
«Պետք է այնպիսի եզրեր գտնել, որ փոքրամասնական թերթերի ազատությունը չմնա ստվերի տակ»,- ասաց նա՝ վերջնական ոչ մի բան չկա այս պահին: