Բելառուսական ընդդիմության համակարգող խորհրդի նախագահության անդամ Օլգա Կովալկովան հայտնվել է Լեհաստանում: Այդ մասին տեղեկացնում է TUT.BY կայքը:
Կովալկովան, որ նախագահի նախկին թեկնածու Սվետլանա Տիխանովսկայայի մտերիմն է, ասել է, որ իրեն դուրս են բերել Օկրեստին փողոցում գտնվող ժամանակավոր պահման մեկուսարանից, ապա տարել սահմանային անցակետ: Այժմ նա գտնվում է Լեհաստանում, բայց մտադիր է վերադառնալ հայրենի երկիր:
«Նրանք եկան մեկուսարան, նստեցրին ինձ իրենց մեքենան, գլխանոց հագցրին, դիմակ տվեցին, նստեցրին հետևի նստատեղին և դուրս հանեցին», – ասել է Կովալկովան Վարշավայում կայացած մամուլի ասուլիսում:
Միևնույն ժամանակ, Բելառուսի սահմանային կոմիտեն պնդում է, որ «սեպտեմբերի 5-ին՝ առավոտյան ժամը 2-ին, նա ոտքով հասել է «Բրուզգի» անցակետ, անցել է սահմանային հսկողությունը, ինչից հետո սպասել է Գրոդնոյից Վարշավա մեկնող ավտոբուսին և հայտնվել Լեհաստանում»:
