Պարետատունը հաստատել է Կորոնավիրուսային հիվանդության (COVID-19) պայմաններում հանրակրթական ուսումնական հաստատություններում գործունեության կազմակերպման ուղեցույցը: Համաճարակային իրավիճակից ելնելով՝ ներկա փուլում ուսումնական գործընթացը հանրակրթության բոլոր մակարդակներում (տարրական, միջին և ավագ) մեկնարկում է 2020 թվականի սեպտեմբերի 15-ից՝ առկա ուսուցմամբ, իսկ 1-ին դասարանցիները դպրոց են հաճախում սեպտեմբերի 14-ին մեկ անձի ուղեկցությամբ: Ուսումնական տարվա առաջին կիսամյակը պարունակում է 13 շաբաթ: ԿԳՄՍ նախարարության հրախարակած կրթական չափորոշիչների նհամաձայն, դպրոցները ապահովվում են դիմակների, ձեռքերի մշակման մաշկային հականեխիչների, ախտահանիչ միջոցների, անձեռոցիկների՝ առնվազն 1 շաբաթվա պահուստով։
Օրվա ընթացքում անձնակազմը և աշակերտներն ապահովվում են անհրաժեշտ դիմակներով և ախտահանիչ նյութերով, հեռավար օգտագործման ջերմաչափով՝ առնվազն դպրոցի մուտքերի թվով։ Դասարանները բաժանում են առավելագույնը 20 սովորող ունեցող խմբերի: Եթե դասասենյակի մակերեսը հնարավորություն չի տալիս ապահովել սոցիալական հեռավորություն 20 սովորողի համար՝ դասարանը բաժանում են 10-հոգանոց խմբերի: Դասագրքերի բաշխումը իրականացնում են օգոստոսի 20-ից սեպտեմբերի 10-ը՝ պահպանելով անվտանգության կանոնները: Դպրոցներում սահմանվում է վեցօրյա աշխատանքային շաբաթ, ըստ անհրաժեշտության կարող է սահմանվել երկհերթ ռեժիմ։ Մինչև 20 սովորող ունեցող դասարանները դպրոց են հաճախում շաբաթվա վեց օրը՝ ըստ դասացուցակի:
Երկու խմբի բաժանված դասարանի խմբերից յուրաքանչյուրը դպրոց է հաճախում շաբաթական երեք օր: Խմբերի դասացուցակը կազմվում է իրար հաջորդող դասերի և ինքնուրույն աշխատանքի օրերի համար: Ինքնուրույն աշխատանքի օրերին սովորողները ուսուցչի հանձնարարած աշխատանքը կատարում են տանը։ Դպրոցներում բուֆետների և ճաշարանների աշխատանքը արգելվում է։ Ի թիվս այլ պայմանների դասասենյակում աշակերտները պարտադիր կրելու են դիմակներ։ Սովորողները դասին մասնակցելու են տեղից: Գրատախտակին մոտ կանչելն արգելվում է:
«Առաջին լրատվական»-ը շրջեց Երևանի մի քանի դպրոցում տեղում ծանոթանալու իրավիճակին։ Երևանի Չեխովի անվան դպրոցում պատրաստվում են դասերի վերսկսմանը, դասասենյակները հարմարեցվում են ըստ պահանջի, մշակվում է դասացուցակը։ Մեզ հետ զրույցում դպրոցի տնօրեն Գայանե Սարուխանյանը նշեց՝ այս պահին բացի տեխնիկական մանրամասնություններից այլ բան ասել չեն կարող։ Նրա խոսքով՝ դասապրոցեսին նախապատրաստվում են լավագույնս՝ փորձելով օրինակ ծառայել մյուս դպրոցների համար։
Անդրանիկ Մարգարյանի անվան դպրոցում ևս աշխատանքային վիճակ էր, դասասենյակների մի մասը արդեն իսկ կահավորվել են համապատասխան 15-20 աշակերտի համար։ Գործընթացը շարունակվում է։ Մեզ հետ զրույցում ուսումնական գծով փոխտնօրենը նշեց՝ իհարկե դժվարություններ լինելու են նորարարությունների պայմաններում, սակայն, նրա խոսքով, պետք է սովորել ապրել COVID-ի պայմաններում։ «Իհարկե, չեմ ասի, որ դժվարություններ չեն լինելու, բայց պետք է սովորենք ապրել այս պայմաններում։ Չենք կարող ասել, որ համավարակը կրթության որակի վրա ոչ մի ազդեցություն չի ունեցել»,- ասաց մեր զրուցակիցը։
Գալով նախարարության պահանջներին, դասասենյակներում դիմակներ կրելուն, փոխտնօրենն ասաց՝ դժվար է լինելու, իհարկե, բայց պետք է համակերպվել։
Մանրամասները՝ «Առաջին լրատվական»-ի տեսանյութում