Աշխարհում COVID-19-ի դեմ զանգվածային պատվաստումները կսկսվեն ոչ շուտ, քան 2021թ.-ի կեսերը: Այս մասին սեպտեմբերի 4-ին հայտարարել է Առողջապահության համաշխարհային կազմակերպության ներկայացուցիչ Մարգարեթ Հարիսը, հայտնում է Reuters-ը:
Այսօրվա դրությամբ կորոնավիրուսի դեմ ստեղծված պատվաստանյութերից ոչ մեկը ցանկալի ազդեցություն ցույց չի տվել. փորձարկումների երկրորդ և երրորդ փուլերում առկա բոլոր դեղամիջոցների արդյունավետությունը 50%-ից պակաս է եղել:
«Մենք իսկապես մինչև հաջորդ տարվա կեսերը զանգվածային պատվաստումներ չենք ակնկալում: Փորձարկումների երրորդ փուլը պետք է ավելի երկար տևի, քանի որ մենք պետք է տեսնենք, թե որքանով է պատվաստանյութը պաշտպանում հիվանդությունից և որքանով է այն անվտանգ»,- ասել է Հարիսը:
Կորոնավիրուսի դեմ պատվաստանյութի փորձարկումների ընթացքում ստացված բոլոր տվյալները պետք է հրապարակվեն և համեմատվեն միմյանց հետ, նշել է ԱՀԿ ներկայացուցիչը:
«Շատերն արդեն պատվաստվել են, բայց մենք դեռ չգիտենք՝ պատվաստանյութն ազդում է, թե ոչ: Այս փուլում մենք հստակ ազդանշան չունենք, թե որքանով է այն արդյունավետ և անվտանգ»,- հայտարարել է Հարիսը: