ԱՄՆ նախագահ Դոնալդ Թրամփն ասել է, որ ճիշտ է համարում այլ երկրների, այդ թվում՝ Ռուսաստանի հետ լավ հարաբերություններ պահպանելը: Այս մասին, ինչպես գրում է The New York Times-ը, նա ասել է Փենսիլվանիայում տեղի ունեցած հանրահավաքում իր կողմնակիցների առաջ ելույթի ժամանակ:
«Նրանք միշտ ասում են. «Թրամփը խելքը թռցրել է, նա չափազանց արմատական է, նա մեզ պատերազմի մեջ կներքաշի,- ասել է Թրամփը հանրահավաքում:- Ես ձեզ հեռու եմ պահել պատերազմներից: Ի՞նչ տեղի ունեցավ Հյուսիսային Կորեայում: Ես «լեզու գտա» Կիմ Չեն Ընի հետ: Նրանք ասացին, որ դա սարսափելի է: Բայց մի՞թե դա լավ չէ: Եթե ես «լեզու գտնեմ» Ռուսաստանի հետ, դա լա՞վ է, թե՞ վատ: Կարծում եմ՝ լավ է»:
Թրամփը քննադատել է ԱՄՆ Դեմոկրատական կուսակցության ներկայացուցիչներին, որոնք, նրա կարծիքով, միշտ խոսում են Ռուսաստանի մասին: «Այս մոլագարները միշտ Ռուսաստանի մասին են խոսում: Նրանք երբեք չեն խոսում Չինաստանի մասին: Միայն Ռուսաստան: Ես լսել եմ, որ նրանք նորից սկսել են… Իսկական մոլագարներ»,- ասել է ԱՄՆ նախագահը:
Թրամփը հավելել է, որ հեռուստացույցով լուրերի թողարկման ժամանակ «Ռուսաստան» բառը լսելիս այն անջատում է:
