Ռուսաստանի ԱԴԾ-ն կանխել է ուսումնական հաստատությունների, մարդկանց զանգվածային հավաքատեղիների և իրավապահ մարմինների շենքերի վրա մի շարք հարձակումներ, 13 մարդ բերման է ենթարկվել, նրանց մեծ մասը սոցիալական ցանցի փակ խմբի անդամներ են:
Ինչպես ուրբաթ օրը «Ինտերֆաքսին» ասել են ԱԴԾ Հասարակայնության հետ կապերի կենտրոնում, այդ քաղաքացիները բերման են ենթարկվել Ռուսաստանի Դաշնության մի շարք մարզերում, նրանք ծրագրում էին զանգվածային սպանություններ «օգտագործելով ինքնաշեն պայթուցիկ սարքեր, բռնկվող խառնուրդներ, սառը զենք», ինչպես նաև համացանցային օգտատերերին դրդել են նման հանցագործություններ կատարել:
Միևնույն ժամանակ, նրանք հավելել են, որ ձերբակալվածներից 11-ը սոցցանցերից մեկի փակ խմբի անդամներ են եղել: Չարամիտների հանցավոր ծրագրերը հաստատվում են նրանցից առգրավված անձնական օրագրերով և կապի միջոցներով, որոնցում հայտնաբերվել են հրկիզող և պայթուցիկ սարքերի պատրաստման ձեւեր, «ուսումնական հաստատությունների, իրավապահ կառույցների շենքերի և մարդկանց զանգվածային հավաքատեղիների վրա հարձակման սխեմաներ»,- հայտարարել են անվտանգության ծառայությունում:
Խուզարկությունների ընթացքում առգրավվել են չորս պատրաստի ինքնաշեն պայթուցիկ սարքեր՝ հարվածող տարրերով, դրանց հավաքման և հրկիզող խառնուրդներ արտադրելու համար մասեր, ինչպես նաև խախտումներով պահվող որսորդական հրացաններ, տրավմատիկ և սառը զենք:
