Երրորդ նախագահ Սերժ Սարգսյանի գրասենյակը օգոստոսի 31-ի երեկոյան ֆեյսբուքյան էջում տարածել էր հատված 1992 թվականի հունիսի 4-ին ԼՂՀ ԳԽ «Արցախ» պաշտոնաթերթին Սերժ Սարգսյանի տված հարցազրույցից: Այն ժամանակ Սարգսյանը զբաղեցրել է Պաշտպանության պետական կոմիտեի նախագահի պաշտոնը: Հարցազրույցի մեջբերված հատվածն այն մասին է, թե ի՞նչն էր առաջնահերթն ու կարևորը այդ ժամանակ ԼՂՀ պաշտպանության կոմիտեի նախագահ Սարգսյանի համար:
«Կուզենայի, որ նստաշրջանը նպաստի ԼՂՀ-ում ռազմական և քաղաքական կայուն իրավիճակ ստեղծելուն: Դրա համար պետք է հաշվի առնել իրական ուժերի փոխհարաբերությունը»,- ասել է Սերժ Սարգսյանն ի պատասխան թղթակցի հարցի:
Սերժ Սարգսյանի գրասենյակը նոր չէ, որ հրապարակում է անցյալի հարցազրույցներից հատվածներ: Միաժամանակ անկասկած է, որ դրանք չեն ընտրվում «կույր վիճակահանության» տրամաբանությամբ, թե երբ և որ հատվածը հրապարակել: Ըստ այդմ՝ խիստ հատկանշական է այն, որ հերթական հատվածը՝ կայունության և ուժերի հարաբերակցությունը հաշվի առնելու մասին, Սերժ Սարգսյանի գրասենյակը հրապարակում է օգոստոսի 31-ին:
Օգոստոսի 31-ը երկրորդ նախագահ Ռոբերտ Քոչարյանի ծննդյան օրն է, որի առիթով նրան շնորհավորել է ՌԴ նախագահ Պուտինը, ընդ որում՝ հեռագրով ու հեռախոսազանգով:
Ահա այն բանից հետո, երբ լրահոսում հայտնվեց տեղեկությունը այդ շնորհավորանքի և Քոչարյան-Պուտին հեռախոսազրույցի մասին, երրորդ նախագահ Սարգսյանի ֆեյսբուքյան էջում հայտնվեց 1992 թվականին «Արցախ» պաշտոնաթերթին Սերժ Սարգսյանի տված հարցազրույցի հատվածը՝ ուժերի փոխհարաբերությունը հաշվի առնելու խորհրդանշական իմաստով: Արդյոք Սերժ Սարգսյանը Ռոբերտ Քոչարյանին կամ թե՛ նրան, թե՛ Պուտինին ակնարկում է ուժերի հարաբերակցությունը հաշվի առնելո՞ւ մասին՝ համարելով, որ նրանց շփման առիթը կամ պատճառը ամենևին լոկ ծննդյան տարեդարձի առիթով բարեկամական շփումը չէ: Թե՞ նրա ակնարկի տողատակի հասցեատերը միայն Ռոբերտ Քոչարյանն է, որին ուղղված է փաստացի պատերազմող երկրի քաղաքական կայուն իրավիճակի կարևորության մասին ակնարկը՝ հաշվի առնելով իշխանություն վերցնելու այն մոդելը, որի մասին Ռոբերտ Քոչարյանը խոսել էր Պուտինի հետ հեռախոսազրույցից առաջ երեք հեռուստաընկերություններին տված հարցազրույցում:
Սերժ Սարգսյանը համարում է, որ Ռոբերտ Քոչարյանը կարող էր այդ մոդելը քննարկել Պուտինի՞ հետ:
Լուսանկարը՝ Armeniasputnik-ի