Ռուսաստանի արտգործնախարար Սերգեյ Լավրովը հայտարարել է, որ հուլիսյան բախումներից հետո թե՛ Հայաստանը, թե՛ Ադրբեջանը շահագրգռված են, որ իրավիճակը հանդարտվի, և վերսկսվեն ԵԱՀԿ Մինսկի խմբի համանախագահների տարածաշրջանային այցերը:
«Մեր գիծը հենվում է 18 տարիների ընթացքում ձևավորված համալիր փաստաթղթերի վրա, կան այսպես կոչված` «Մադրիդյան սկզբունքներ», և կան փաստաթղթերի թարմացված տարբերակներ: Մենք հիմա տեսնում ենք, թե ինչպես այսպես կոչված` լճացման պայմաններում լսվում են ձայներ, որ պետք է հրաժարվել այդ փաստաթղթերից և սկսել մաքուր էջից, կամ էլ ինչ-որ «Պլան Բ»-ի գործողության մեջ դնելու մասին են խոսում»:
Թեմայի շուրջ «Առաջին լրատվական»-ի հետ քննարկմանը մասնակցեցին «Իրազեկ քաղաքացիների միավորում» ՀԿ ծրագրերի համակարգող Դանիել Իոաննիսյանը, «Հանուն հանրապետության» նախաձեռնության անդամ, քաղաքագետ Ռուբեն Մեհրաբյանը և «Ժառանգություն» կուսակցության նախագահ Նարինե Դիլբարյանը:
«Հայկական կողմը երկարաժամկետ առումով հետաքրքրված է խաղաղությամբ, շահագրգռված է բնակցել և 90-կաններին դե ֆակտո ձեռք բերվածը դե յուրե ամրագրելով: Իսկ ադրբեջանական կողմը ուժային ծանր հարված ստանալուց հետո միշտ էլ ուզում է բանակցել, որովհետև հասկանում է, որ ուժային դաշտում խնդիրը չի կարողանում լուծել,- նշեց Դանիել Իոաննիսյանը: -Պլան Բ ասելով՝ Լավրովը հավանաբար ավելի շատ նկատի է ունեցել Հայաստանի իշխանությունների՝ մաքուր էջից սկսելու պլանը, այսինքն՝ Հայաստանի իշխանություններն անընդունելի են համարում այն, ինչ բանակցել է Սերժ Սարգսյանը: Պետք է սկսել նոր տրամաբանությամբ, որի հիմնաքարերից է այն, որ Արցախը պետք է ներկայացված լինի բանակցություններում… Պաշտոնական Մոսկվան ուզում է, որ բանակցություններն ընթանան այնպես, ինչպես Ս. Սարգսյանի և Ռ. Քոչարյանի օրոք»:
Ռուբեն Մեհրաբյանի դիտարկմամբ՝ Լավրորվը փորձում է թերագնահատել հայկական կողմի մտավոր ունակությունները. «Գործող միակ փաստաթուղթը եռակողմ կնաքված համաձայնագիրն է՝ կրակի դադարեցման մասին, պարոն Լավրովը մոռանում է այդ համաձայնագրի մասին և չի նշում, որ այն պետք է սրբորեն պահպանել, և խախտողները պետք է պատժվեն, ինչին Բաքուն դեմ է գնում՝ Մոսկվայի տանիքի ներքո»:
Նարինե Դիլբարյանն ընդգծեց, որ պետք է առաջնորդվել հրադադարի համաձայնագրով, «որն առ այս պահը Արցախյան հակամարտության վերաբերյալ կնքված ամենաարդյունավետ փաստաթուղթն է»:
Մանրամասն՝ տեսանյութում: