Կորոնավիրուսի դեմ ռուսաստանյան պատվաստանյութի փորձարկումներին մասնակցող կամավորների քառորդ մասը, կստանա պլացեբո: Այդ մասին ասվում է «Սպուտնիկ V» պատրաստուկի փորձարկումների հատգրանցումային փուլի նկարագրության մեջ:
«Փորձարկմանը մասնակցում է 18-ից բարձր տարիքի 40 հազար կամավոր: Հետազոտությունից հետո նրանց բաժանում են երկու խմբի՝ 10 հազար մարդուց բաղկացած ստուգիչ խումբ, որոնք կստանան պլացեբո, եւ 30 հազար հոգուց բաղկացած հիմնական խումբ, որոնք կստանան պատվաստանյութ»,-նշվում է փաստաթղթում:
Կորոնավիրուսի դեմ աշխարհում առաջին պատվաստանյութը մշակվել է Գամալեյայի անվան համաճարակաբանության և մանրէաբանության ազգային հետազոտական կենտրոնում (ՀՄԱՀԿ)՝ Ռուսաստանի ուղղակի ներդրումների հիմնադրամի (ՌՈւՆՀ) հետ համատեղ: ՌՈւՆՀ-ի ղեկավար Կիրիլ Դմիտրիևը հայտնել է, որ հիմնադրամն ավելի քան 20 երկրից 1 միլիարդ չափաբաժին գնելու հայտ է ստացել: Նա նշել է, որ Ռուսաստանը պատվաստանյութի արտադրության շուրջ պայմանավորվել է հինգ երկրների հետ, առկա հզորությունները թույլ են տալիս մեկ տարում արտադրել մինչև 500 միլիոն չափաբաժին:
ՌԴ առողջապահության նախարար Միխայիլ Մուրաշկոն հայտարարել է, որ պատվաստանյութը կսկսեն արտադրել երկու հարթակներով՝ Գամալեյայի անվան կենտրոնի և «Բիննոֆարմ» գործարանի կողմից: Նախագահ Վլադիմիր Պուտինը հայտարարել է, որ պատվաստանյութն անցել է բոլոր անհրաժեշտ ստուգումները և ձևավորում է կայուն իմունիտետ:
Օգոստոսի վերջին առողջապահության նախարարությունը Գամալեյայի կենտրոնին թույլատրել է անցկացնել կորոնավիրուսի դեմ պատվաստանյութի հետգրանցումային հետազոտություններ: Դրանք կսկսվեն արդեն այս շաբաթ: