Չինաստանում Հնդկաստանին նախազգուշացրել են նոր սահմանային պատերազմի դեպքում լուրջ կորուստների մասին

The Global Times չինական թերթը սեպտեմբերի 1-ին նախազգուշացրել է, որ Չինաստանի և Հնդկաստանի սահմանին զինված հակամարտության դեպքում հնդկական զորքերն ավելի լուրջ կորուստներ կկրեն, քան 1962 թվականի սահմանային պատերազմի ընթացքում:

«Եթե Հնդկաստանը ցանկանում է մրցակցել, ապա նա պետք է հաշվի առնի, որ Չինաստանն ավելի շատ գործիքներ և հնարավորություններ ունի, քան ինքը:

Եթե Հնդկաստանը ռազմական դիմակայություն ցանկանա, Չինաստանի ժողովրդաազատագրական բանակը (ՉԺԱԲ) անխուսափելիորեն կստիպի հնդկական բանակին անհամեմատ ավելի լուրջ կորուստներ կրել, քան դա եղել է 1962 թվականին»,-ասվում Է թերթի խմբագրական հոդվածում:

Նախօրյակին՝ օգոստոսի 31-ին, Հնդկաստանի պաշտպանության նախարարությունը չինացի զինվորականներին մեղադրել է Լադակհ-ի սահմանային շրջանում սադրիչ գործողությունների մեջ, որոնք, Դելիի կարծիքով, ուղղված են եղել տարածքի կարգավիճակը փոխելուն:

Պաշտպանական գերատեսչության տվյալներով՝ «ՉԺԱԲ-ը օգոստոսի 29-ին սադրիչ տեղաշարժեր է կատարել ստատուս-քվոն փոխելու համար և խախտել է փոխհամաձայնությունը, որը ձեռք է բերվել դիվանագետների և զինվորականների հանդիպումների ժամանակ»: