ՌԴ նախագահ Վլադիմիր Պուտինը ոչ միայն հեռագրով է շնորհավորել Ռոբերտ Քոչարյանի ծննդյան տարեդարձը, այլ նաև հեռախոսազրույցով, այդպիսով գործնականում ընդգծելով, որ ակտը արարողակարգի տիրույթում չէ, այլ գործնական քաղաքականության: Որքան էլ համարվի, որ շփումը պայմանավորված է անձնական ջերմ հարաբերությամբ, այդուհանդերձ ակնհայտ է, որ թե՛ Վլադիմիր Պուտինն է ներկայումս, բնականաբար, քաղաքական կարգավիճակի կրող, թե՛ Ռոբերտ Քոչարյանն է խոսում իր քաղաքական ծրագրերի և հավակնությունների մասին: Այդպիսով, ակնառու է, որ կոնտակտը քաղաքական է: Այդ ֆոնին հետաքրքիր հայտարարություն է արել ԲՀԿ նախագահ Գագիկ Ծառուկյանը, Գեղարքունիքի իր կուսակիցների հետ հանդիպմանը անդրադառնալով իր ձերբակալման թեմային և ասելով, թե իր ձերբակալումով ոչ մի խնդիր չի լուծվի: Ծառուկյանն, անշուշտ, նկատի ունի սոցիալական, տնտեսական և այլ բնույթի խնդիրները, որոնց մասին խոսել է և քննադատել ընթացիկ վիճակը, սակայն համատեքստում կալանքի խնդրին անդրադարձը, անշուշտ, թելադրված կամ ազդված է քաղաքական իրողություններով:
Մասնավորապես, Գագիկ Ծառուկյանը դեռևս ամիսներ առաջ հայտարարեց, որ Հայաստանում տեսնում է հակառուսականության ալիք և, որպես Հայաստանի երկրորդ քաղաքական ուժի, հզոր քաղաքական ուժի ղեկավար ինքն անելու է ամեն ինչ այդ ալիքի դեմ պայքարի և ալիքը չեզոքացնելու համար: Մի կողմ թողնենք, կա՞ այդպիսի ալիք, թե դա մտացածին է, քարոզչական տեխնոլոգիա է, թե՞ քաղաքական հաշվարկ: Էականը Ծառուկյանի հայտն է, լինել Հայաստանում «հակառուսականության» դեմ պայքարի առաջին ջութակ: Բայց Ռոբերտ Քոչարյանի հանդեպ Պուտինի վերաբերմունքն ու անձնականի շղարշի ներքո քաղաքական կոնտակտները վկայում են այլ հաշվարկի մասին: Մասնավորապես այն, որ Ռուսաստանը, կարծես թե, այդքան էլ հակված չէ Գագիկ Ծառուկյանին տեսնել այդ կարգավիճակում: Մոսկվան, իհարկե, դեմ չէ Հայաստանում «հակառուսականության ալիքի» վերաբերյալ ինֆորմացիոն տեղումներին և այդ «ալիքի» առկայության մտայնության գեներացմանը, բայց բոլորովին այլ քաղաքական դերակատարի՝ Ռոբերտ Քոչարյանի համար: Այդ ֆոնին է, որ Գագիկ Ծառուկյանը, որի կալանքի հարցը դատարանում է, Նիկոլ Փաշինյանին հիշեցնում է, որ իր կալանավորումով չի փոխվի ոչինչ, և չի լուծվի որևէ հարց:
Ասել կուզի, Գագիկ Ծառուկյանը Փաշինյանին ակնարկում է, որ ինքը չէ նրա գլխավոր խնդիրը, այլ նա, ում շնորհավորում է Պուտինն ու ով ունենում է նրա հետ հեռախոսային զրույց: Կլսի՞ Նիկոլ Փաշինյանը Ծառուկյանին, որն արձակուրդում է և Ռոբերտ Քոչարյանի ծննդյան օրը մեկնարկած արձակուրդը սկսել է Մանթաշաբերդից՝ Աշոտ Երկաթի ամրոցից: Պարունակո՞ւմ է դա որևէ խորհուրդ, թե՞ Փաշինյանի մեկնարկը լիովին ապաքաղաքական է, այստեղ բարդ է գալ միարժեք և հաստատուն եզրակացության: Բայց խորհրդանշականությունն, անշուշտ, խոսուն է՝ Պուտին-Քոչարյանի «տոնական» հեռախոսազրույցի ֆոնին Նիկոլ Փաշինյանի արձակուրդային «լայվը» Մանթաշաբերդի բարձրությունից:
Գագիկ Ծառուկյանը Նիկոլ Փաշինյանին առաջարկում է ներքևում համատեղ խաղ: Կհամաձայնի՞ դրան Փաշինյանը, թե՞ նրա համար առավել հարմար է խաղալ Ռոբերտ Քոչարյանի հետ, քանի որ ավելի մեծ է հաջողության շանսը: Իհարկե, այնպես չէ, որ Ծառուկյանի հետ խաղի դեպքում Փաշինյանի համար նրան հաղթելու շանսը մեծ չէ: Բայց, եթե նրա համար հարմար մրցակից է Ռոբերտ Քոչարյանը, ապա Փաշինյանը, թերևս, չի խուսանավի նրա հետ ուղիղ դիմակայությունից կամ մրցակցությունից՝ թեկուզ Քոչարյանին Ռուսաստանի նախագահի թիկունքային աջակցությամբ: Վերջին հաշվով, Գագիկ Ծառուկյանի վրա ծախսված էներգիան կարող է լինել ուժերի ավելորդ վատնում, որովհետև Փաշինյանին, միևնույն է, երևի թե հարկ է լինելու դեմ առ դեմ մրցել նաև Ռոբերտ Քոչարյանի հետ:
Լուսանկարը՝ Armeniasputnik-ի