Ամերիկյան The Washington Post պարբերականը խմբագրական սյունակ է հրապարակել ռուսաստանցի ընդդիմադիր գործիչ Ալեքսեյ Նավալնիի թունավորման մասին: Դրանում լրագրողները պահանջում են միջազգային հետաքննություն անցկացնել և հայտնաբերել նրան, ով «թույն է լցրել նրա թեյի մեջ կամ հրամայել է դա անել»:
Սյունակում խոսվում է լրագրող Աննա Պոլիտկովսկայայի և ՀԴԲ-ի նախկին սպա Ալեքսանդր Լիտվինենկոյի թունավորման մասին. նրանց ինքնազգացողությունը, ինչպես և Նավալնիինը, վատացել է մեկ բաժակ թեյ խմելուց հետո:
Հոդվածում նշվում է նաև, որ հատուկ ծառայությունները մշտապես հետևել են Նավալնիին: «Արդյո՞ք նրանք հետևում էին Նավալնիին, երբ նա Մոսկվա թռչելուց առաջ թեյ էր պատվիրում Տոմսկի օդանավակայանի սրճարանում: Օմսկում արտակարգ վայրէջքից հետո բժիշկներն ասում էին, որ նրա օրգանիզմում թույն չեն հայտնաբերել, բայց տարօրինակ կերպով գրեթե երկու օր մերժում էին Նավալնիին որևէ այլ երկրի կլինիկա տեղափոխելու առաջարկը`միգուցե այն հույսով, որ թույնը դուրս կգա նրա օրգանիզմից և այն այլևս անհնար կլինի հայտնաբերել»,- ասվում է The Washington Post-ի սյունակում:
Կրեմլի արձագանքը Նավալնիի թունավորմանը լրագրողները «սարսափելիորեն անտարբեր» համարեցին, իսկ Թրամփի վարչակազմը՝ «ծայրաստիճան երկչոտ»:
«Նավալնիի թունավորումը պետք է մանրակրկիտ հետաքննվի՝ անկախ նրանից, թե ուր կտանի ճշմարտությունը:
Անհրաժեշտ է միջազգային հետաքննություն անցկացնել, քանի որ Ռուսաստանը դժվար թե դա անի ազնվորեն: Պարոն Նավալնին չի կարող պարզապես ևս մեկ անուն դառնալ Պուտինի զոհերի ցուցակում: Պետք է հայտնաբերել նրան, ով «թույն է լցրել նրա թեյի մեջ կամ հրամայել է դա անել»,- ասվում է սյունակում:
Բեռլինի «Շարիտե» կլինիկայի վերջին տվյալների համաձայն, Նավալնին դեռ արհեստական կոմայի մեջ է, բայց նրա վիճակը բարելավվում է: Գերմանացի բժիշկները կարծում են, որ նրան թունավորել են: