Կրեմլի կայքում հայտնվել է Պուտինի շնորհավորանքը Ռոբերտ Քոչարյանի ծննդյան տարեդարձի կապակցությամբ: Պուտինը, շնորհավորելով նրան, մաղթում է ոգու ամրություն, ասում նաև, որ Ռուսաստանում նրան գնահատում են որպես պետական գործիչ, որը շատ բան է արել ժամանակակից Հայաստանի կայացման համար: Պուտինի գնահատականի իրավացիությունն ու արդարացիությունը չէ այստեղ քննարկման առարկան, քանի որ այդ հարցում ինչպես Պուտինն ունի իր գնահատականը, այնպես էլ իրենց գնահատականն ունեն Հայաստանի հանրային խմբերը, շերտերը, քաղաքական դերակատարները և այլն: Տվյալ պարագայում հատկանշական է ինքնին շնորհավորանքի և գնահատականի հանգամանքը՝ որպես ազդակ, որ Ռուսաստանը Ռոբերտ Քոչարյանին դիտարկում է որպես Հայաստանի ներքաղաքական կյանքում իր հիմնական հենարան: Այլ հարց է, թե ինչ հեռանկար է դիտարկվում այդ հենարանի ներքո՝ Ռոբերտ Քոչարյանին իշխանության բերելու ծրագիր կա՞՝ անձամբ, կամ միջնորդավորված որևէ ուժի միջոցով, թե՞ խնդիրը բոլորովին այլ է:
Մասնավորապես, Ռոբերտ Քոչարյանի միջոցով Ռուսաստանը կարող է այսպես ասած՝ պահել հայաստանյան քաղաքական դաշտում ընդդիմադիր հեռանկարների վրա իր ազդեցությունը, քանի դեռ չի ձևավորել ուժ, որը կլինի առավել արդիականության փաթեթի մեջ՝ նոր դեմքերով, նոր գաղափարներով, նոր մոտեցումներով, և իր հաստատուն տեղը կզբաղեցնի ընդդիմադիր դաշտում: Այն տեղը, որը այդ ուժի համար կամա, թե ակամա պահում է Ռոբերտ Քոչարյանը, այժմ թույլ չտալով, որ Հայաստանում ձևավորվի այլընտրանքային ընդդիմադիր դիսկուրս: Այսպես թե այնպես, Պուտինի շնորհավորանքը թերևս վկայում է, որ իզուր սպասման մեջ են այն ուժերը, որոնք ակնկալում են ստանալ Հայաստանում ընդդիմադիր գործունեության և իշխանության տանող պուտինյան օրհնություն: Կրեմլի կայքը հուշում է, որ օրհնությունը «ստացել» է Ռոբերտ Քոչարյանը, իհարկե, դեռ մինչև վերջ պարզ չէ, թե հատկապես ուր տանող ճանապարհի: