Խաղողի բերքը հասունացել է, սակայն պաշտոնապես մթերման սեզոնի մեկնարկը տրված չէ։ Գին ու պայմանագիր էլ գյուղացուն դեռևս ապրիլ ամսից առաջարկել է միայն Երևանի կոնյակի գործարանը։ Այս մասին «Առաջին լրատվական»-ի հետ զրույցում ասաց Հայաստանի խաղողագործների միության նախագահը։
Սարգսյանն ասաց, որ այս տարի բերքը միջին չափի է, մթերման հետ կապված պետք է որ խնդիրներ չառաջանան, բայց մինչ մթերումը տարվող մանիպուլիատիվ խոսակցություները այն մասին, որ ահռելի բերք է սպասվում, հասկանալի չէ, թե ինչպես են այդքան մթերելու և այլն, արդեն հուշում է , որ հնարավոր է խնդիրներ առաջանան. «Մենք այսօր բացի Երևանի կոնյակի գործարանից, մնացածի մասով չգիտենք ինչ է լինելու, ինչ գին է ասվելու։ Բայց կուլիսներում շատ անկումային թվեր են պտտվում, որ այդ գնով պետք է մթերվի։ Աստված չանի, բայց ոնց որ ամեն ինչ տանում են նրան, որ խաղողի գնի հետ ինչ-որ խաղ խաղան ու ցածր գին սահմանեն։ Դեռևս գարնանից ասում են, թե աննախադեպ շատ բերք կա, բայց նման հայտարարություն կարող է անել խաղողագործն ու խաղողագործների միությունը, այլ ոչ թե գինեգործներն ու ձեռնարկությունների տերերը։ Իսկ եթե նրանք են նման բան ասում, դա նշանակում է, որ ուզում են մի խաղ խաղան խաղողագործների ու խաղողի գլխին։ Նրանցից ոչ մեկ իրականում խաղողագործին չի այցելել, իր աչքով բերքը չի տեսել, չի զրուցել խաղողագործի հետ։ Բա էդ ոնց որոշեցին, որ բերքը աննախադեպ շատ է ու հիմա էլ չգիտեն ուր լցնեն այդ բերքը»,-ասաց Սարգսյանը։
Խաղողագործների միության նախագահը շատ բացասական է գնահատում, որ կառավարությունը խաղողագործների հետ որևէ շփման մեջ չի մտնում։ Իսկ այդ հանգամանքը մի շարք խնդիրներ է առաջացնում.«Այսօրվա չինովնիկները լայաղ չեն անում անգամ ոլորտային կազմակերպությունների հետ հանդիպել, խնդիրները լսել, քննարկումներ ունենալ։ Մի քանի անգամ դիմել ենք հանդիպման համար ու մերժում ենք ստացել։ Կառավարություն-գյուղացի կապ բացարձակ չկա ու դրա պատճառով լիքը խնդիրներ են ի հայտ եկել։ Իրենք խաղողագործների հետ չեն հանդիպել, չգիտեն ինչքան բերք կա, բայց գինեգործները վեր են կենում ու հայտարարում են, թե բերքը շատ է, աննախադեպ չափերի է ու համաճարակով պայմանավորված վաճառք չկա ու հայտնի չէ, թե այդքան բերքը ինչ պետք է անեն։ Նույն 2015 թվական սցենարն է։ Այդ հայտարարությունների պատճառով էլ գյուղացու հետ պայմանագիր կնքած ընկերությունները զանգահարում են գյուղացուն և ասում են եկեք պայմանագիրը փոխեք, քանի որ մենք վճարման խնդիրներ ունենք։ Ու խաղողագործը, որը 150 դրամի ակնկալիք ուներ, հիմա հույսը կորցրած, անորոշության մեջ չգիտի, թե մթերումը ոնց է իրականացնելու»,-ասաց Սարգսյանը՝ հավելելով, որ սա չի խանգարում հեռուստատեսությամբ հայտարարել, որ ոչ մի խնդիր չկա, բոլորին 24 ամսով արտոնյալ վարկ են տրամադրել և այլն.«Բայց մի ընկերություն չկա, որ հիմա արդեն պայմանագիր կնքած լինի, գին ու ժամանակացուցյ ֆիքսած լինի։ Բացի Երևանի գինու, կոնյակի գործարանից։ Նման խնդիրների առաջ է կանգնած այսօր գյուղացին։ Էլ չենք ասում ոռոգման խնդիրների մասին։ Պտղալիցքի ժամանակ է, այս ընթացքում 10 օրը մեկ խաղողը արարատյան հարթավայրում պետք է ջրվի, բայց մեկ էլ առանց պատճառաբանության 4-5 օրով ջուրը կկտրեն ու ոչ ոք չի ասում, թե պատճառը որն է»,-ասաց Սարգսյանը՝ հավելելով, որ նման ձևով գյուղատնտեսություն չեն զարգացնում։
Նշենք, որ Հայաստանում 89 ձեռնարկություն ունեն խաղողի գնման, վերամշակման լիցենզիա։ Այդ գործարանների հիմնական մասը արտադրանք է թողարկում առանց մթերում իրականացնելու։ Ոչ մեկին հայտնի չէ, թե նրանց արտադրանքը ինչ հումքով է։ «Եթե 89 ձեռնարկություն յուրաքանչյուրը 2000 տոնա խաղող ընդունի, մենք հանրապետությունում 160 հազար տոննա մթերում կանենք, սակայն այդքանի հնարավորություն չունենք։ Մինչդեռ կառավարության կողմից ամեն տարի գրեթե այդքան թիվ է հրապարակվում։ Իսկ իրականում խաղողի մթերման թիվը կեղծվում է, կառավարական մակարդակով նկարվում են թվերը, որտեղից էլ առաջ են գալիս բոլոր արատավոր երևույթները՝ գյուղացու սնանկացում, խաղողագործի և մթերող ձեռնարկության միջև անջրպետ։ Թիվը կեղծվում է , իսկ դրա ֆոնին որոշ ձեռնարկություններ անհայտ ծագման սպիրտը օրինականացնում են ու արտադրանք են թողքարկում։ Այսինքն այնքան մթերում չի իրականացվում, որքան արտադրանք է թողարկվում։ Եվ զարմանալիորեն ոչ մեկին այս հարցը չի հուզում, ցավոք սրտի»,-եզրափակեց Արտակ Սարգսյանը։