Երևանի ավագանու Մշակույթի հանձնաժողովի անդամները դրական եզրակացություն են տվել Մարտի 1-ի զոհերի հիշատակին նվիրված հուշարձանի տեղադրմանը Երևանի Զաքյան, Բեյրութի և Գրիգոր Լուսավորիչ փողոցներով շրջապատված Մանկական այգում։ Այդ մասին հայտնել է ավագանու «Իմ քայլը» խմբակցության անդամ Գրիգոր Երիցյանը։
Բաց մրցույթում հաղթած բրոնզից և քարից հուշարձանը կոչվում է «Ազդեցություն և հակազդեցություն», հեղինակը քանդակագործ Ալբերտ Վարդանյանն է:
Մարտի 1-ի զոհերից Գոռ Քլոյանի հայրը՝ Սարգիս Քլոյանն «Առաջին լրատվական»-ի հետ զրույցում ասաց, որ մեկ ամիս առաջ եղել են քաղաքապետարանում, տեսել են մակետը, հավանել են և շատ ուրախ են, որ վերջապես իրենց ցանկությունը կիրականանա.«Մեզ ասել են, որ մարտի 1-ին արդեն հուշարձանը պատրաստ կլինի և բացումը կլինի։ Շատ սիրուն է, մենք հավանել ենք, մեր սրտով է։ Ինչպես ասում են՝ ուշ լինի, նուշ լինի։ Մենք էլ տեսնենք՝ մխիթարվենք այդ հուշարձանով։ Այլ բան չեմ կարող ասել»,-ասաց Քլոյանը։
Մեր զրուցակիցը ցավում է, որ մարտի 1-ի հուշարձանն արդեն պատրաստ է, սակայն մարտի 1-ի գործով որեւէ մեկը դեռևս պատասխանատվություն չի կրել և հայտնի էլ չէ, թե սկսված գործընթացի վերջն ինչ է լինելու.«9 փաստաբան դուրս են եկել երկուսի դեմ և միտումնավոր ամեն ինչ անում են՝ թույլ չտալու համար, որ գործը տեղից շարժվի։ Միջնորդություններից պրծան, հիմա էլ ամեն մեկը հերթով գնալու է արձակուրդ։ Արմեն Գևորգյանի փաստաբանն է գնացել արձակուրդ, նա կգա, հաջորդի փաստաբանը կգնա ու այդպես շարունակ։ Իսկ մենք սպասելու ենք, որ մի օր դատաքննությունը սկսվի։ Բայց այսպես շարունակվել չի կարող։ Հանցագործն ազատության մեջ է, հանցագործը հարցազրույցներ է տալիս, քննարկումներ է վարում, Սևանում լողանում է, իսկ մեր սիրտը ուղղակի տրաքում է։ Սա անթույլատրելի է։ Սահմանադրական կարգի տապալման մեջ մեղադրվող հանցագործը չի կարող լինել ազատության մեջ։ Քոչարյանի տեղը ճաղերի հետևն է»,-ասաց Քլոյանը։
Սարգիս Քլոյանը դանդաղկոտություն է տեսնում նաև ՀՔԾ-ի կողմից, որի վարույթում առ այսօր քննվում է մարտի 1-ի մայր գործը.«Այո, դանդաղկոտություն կա, բայց եթե մտնենք դատաքննության փուլ, ես հավատացած եմ, որ դատավարության ժամանակ ամեն ինչ ջրի երես դուրս կգա՝ սպանողներն էլ, նրանց անուն ազագանուններն էլ։ Եթե ոչ բոլոր դեպքերով, ապա Չերյոմուխայով սպանվածները հաստատ կբացահայտվեն, որովհետև Չերյոմուխային փամփուշտ չի լինում։ Իսկ մնացած դեպքերում, հիշում ենք, որ փամփուշտները փոխել էին։ Չնայած ես ՀՔԾ-ում անուններ տվել եմ, թե Չերյոմուխայից կրակողները ովքեր են եղել։ Ես տվել եմ նրանց հրաման տվողների ու անմիջական սպանութոյւն իրականացնողների անունները։ Որ մտնենք դատաքննություն այս ամենը դուրս կգա ջրի երես։ Ես հավատացած եմ»,-եզրափակեց Քլոյանը։