Նոյեմբերի 24-ին, Մայր Աթոռ Սուրբ Էջմիածնում Ն.Ս.Օ.Տ.Տ Գարեգին Բ Ծայրագույն Պատրիարք և Ամենայն Հայոց Կաթողիկոսն ընդունեց ՙԲարի գալուստ Հայաստան՚ կին դիվանագետների և դիվանագետների կանանց ասոցիացիայի անդամներին` գլխավորությամբ ասոցիացիայի նախագահ տիկ. Նատալիա Նալբանդյանի:
Ողջունելով հյուրերին` Նորին Սրբությունը գնահատանքով անդրադարձավ այն կարևոր ծառայությանը, որ ասոցիացիայի անդամներն իրականացնում են ժողովուրդների միջև հարաբերությունների սերտացման, բարեկամական կապերի ամրապնդման գործում, բարեգործական տարբեր ձեռնարկներում:
Հանդիպմանն Ամենայն Հայոց Կաթողիկոսը դիվանագետների կանանց ներկայացրեց Մայր Աթոռ Սուրբ Էջմիածնի խորհուրդը հայ ժողովրդի կյանքում, տեղեկացրեց Մայր Աթոռի կողմից իրականացվող գործունեության մասին, անդրադարձավ խոնարհված եկեղեցիների վերականգնմանը և նոր եկեղեցիների կառուցմանը, ժողովրդի քրիստոնեական դաստիարակության ծրագրերին, նոր հոգևորականների պատրաստությանը, ինչպես նաև Հայ Եկեղեցու հովանու ներքո գործող տարբեր սոցիալական ծառայություններին:
Ներկաներին հնարավորություն ընձեռվեց հարցեր ուղղել Նորին Սրբությանը, որոնք վերաբերում էին հիմնականում Հայ Եկեղեցու միջեկեղեցական և միջկրոնական հարաբերություններին, տարբեր երկրներում գտնվող հայ համայնքներին:
Հանդիպման վերջում տիկին Նալբանդյանը ասոցիացիայի անդամների անունից Նորին Սրբությանը երախտագիտություն հայտնեց ջերմ ընդունելության համար£ Ապա խումբն այցելեց Մայր Աթոռ Սուրբ Էջմիածնի թանգարաններ, ծանոթացավ Հայ Եկեղեցու նվիրական սրբություններին և հոգևոր արժեքներին:
Մայր Տաճար այցելությունից հետո ասոցիացիայի անդամներն այցելեցին Էջմիածնի հայորդյաց տուն, որտեղ նրանց ողջունեց Մայր Աթոռի և ՀԲԸՄ հովանու ներքո գործող հայորդյաց տների հոգևոր տեսուչ Տ. Կոմիտաս վարդապետ Հովնանյանը: Ամենայն Հայոց Կաթողիկոսը և խմբի անդամները ծանոթացան Հայորդյաց տան սաների աշխատանքներին, ապա ներկա գտնվեցին երեխաների ներկայացրած համերգին: Վերջում սաներն իրենց աշխատանքներից ընծայեցին դիվանագետների կանանց:
Մայր Աթոռ
