Ռուսաստանի միջամտությունը Բելառուսում տիրող իրավիճակին «հնարավոր վատագույն տարբերակը» կլինի։ Այս կարծիքն է օգոստոսի 28-ին հայտնել Ֆրանսիայի նախագահ Էմանուել Մակրոնը, արձագանքելով ՌԴ նախագահ Վլադիմիր Պուտինի խոսքերին՝ Ռուսաստանում իրավապահներից կազմված հատուկ պահուստ ստեղծելու մասին, որը իրավիճակի սրման դեպքում Բելառուս կուղարկվի:
Մակրոնի խոսքերով, Պուտինի հետ հեռախոսազրույցում նա ուղղակիորեն անցանկալի է անվանել Բելառուսում Ռուսաստանի ռազմական կամ ոստիկանական միջամտությունը:
Ըստ Մակրոնի, ոչ ինքը, ոչ էլ Գերմանիայի կանցլեր Անգելա Մերկելը չեն ցանկանում «որ կրկնվի այն, ինչ տեղի ունեցավ Ուկրաինայում» 2014 թվականին, երբ նախագահ Վիկտոր Յանուկովիչը փողոցային զանգվածային ցույցերից հետո փախավ երկրից, իսկ Ռուսաստանը «ռուսալեզու բնակչությանը պաշտպանելու» պատրվակով բռնակցեց Ղրիմը, այնուհետև օգնություն ցուցաբերեց Դոնբասի անջատողականներին, ինչը հանգեցրեց մինչ օրս շարունակվող զինված հակամարտության:
Մակրոնը նշել է, որ ինքը և Մերկելը ցանկանում են, որպեսզի Պուտինը համոզի Լուկաշենկոյին՝ ԵԱՀԿ-ն Բելառուսի իշխանությունների և ցուցարարների միջև որպես միջնորդ ներգրավելու անհրաժեշտության մասին: Ֆրանսիայի նախագահի խոսքերից հետևում է, որ Պուտինը այս գաղափարը փոխանցել է Լուկաշենկոյին, սակայն Բելառուսի ղեկավարը դրա հետ չի համաձայնել:
