Հայկական ֆուտբոլը ստացավ հերթական ապտակը։ Եվրագավաթների խաղարկության որակավորման փուլում մեր թիմերի ցույց տված արդյունքը, խայտառակ լինելուց զատ, նաև բացառիկ կարելի է համարել։ Եվրոպա լիգայի որակավորման առաջին փուլում երեկ Հայաստանի փոխչեմպիոն «Նոան» հյուրընկալվելիս 4։1 հաշվով զիջեց ղազախական «Կայրաթին»։ Այնուհետև Հայաստանի բրոնզե մեդալակիր «Ալաշկերտը» Երևանում 0։1 հաշվով պարտվեց մակեդոնական «Ռենովային»։ Գյումրիի «Շիրակն» էլ Բուխարեստում 3։0 հաշվով մրցավեճը տանուլ տվեց «Ստյաուային»։ Ավելի վաղ Չեմպիոնների լիգայի խաղարկության որակավորման փուլում Հայաստանի չեմպիոն «Արարատ-Արմենիան» սեփական հարկի տակ 0։1 հաշվով զիջել էր կիպրական «Օմոնիային»։
Այսպիսով հայկական 4 ակումբները, եվրոպական մրցասպարեզում կրելով 4 պարտություն, ընդհանուր առմամբ խփեցին ընդամենը մեկ գնդակ։ Սա լավագույնս է արտացոլում հայկական ֆուտբոլում և մասնավորապես Հայաստանի առաջնությունում տիրող պատկերը։ Բայց սա թերևս ամենամտահոգիչը չէ։ Բացառությամբ Գյումրիի՝ մյուս 3 թիմերի մեկնարկային կազմերում ընդհանուր առմամբ խաղադաշտ դուրս եկան ընդամենը 2 հայ ֆուտբոլիստներ՝ ի դեմս «Ալաշկերտի» պաշտպան Տարոն Ոսկանյանի և կիսապաշտպան Արտակ Գրիգորյանի։
«Արարատ-Արմենիան» միակ թիմն էր Չեմպիոնների լիգայի որակավորման երկրորդ փուլում, որի կազմում խաղադաշտ դուրս եկան բացառապես լեգեոներներ։ «Արարատ-Արմենիայի» ռեկորդը կրկնեց նաև «Նոան» արդեն Եվրոպա լիգայի որակավորման առաջին փուլում։ Թե ինչ ֆուտբոլ խաղացին երեկ «Նոայի» և «Ալաշկերտի» դրսից բերված տղերքը, կարծում ենք՝ մեկնաբանության կարիք չունի։ Պարզապես ամոթ էր։ Արդյոք հայ ֆուտբոլիստները ավելի վա՞տ կխաղային։ Հարցի պատասխանը թողնում ենք ընթերցողի հայեցողությանը։
Ցավոք, ոմանք շարունակում են մնալ այն համոզմունքին, որ ոչ հայկական ազգանվամբ ֆուտբոլիստներն ավելի լավ են խաղում և կարող են նպաստել հաջողությանը։ Բերելուց գոնե նորմալ ֆուտբոլիստներ բերեք, որպեսզի ո՛չ դուք խայտառակ լինեք, ո՛չ մենք՝ երկրպագուներս։ Օրինակ՝ «Կայրաթի» կազմում խաղում էր 36-ամյա Վագներ Լավը, ով թեև «դախացած», բայց այնուամենայնիվ ֆուտբոլիստ է։ «Դախացած» ֆուտբոլիստ, որն այնուամենայնիվ դաս տվեց «Նոայի» խաղացողներին։
Թե ուր է տանելու հայկական ակումբների և մասնավորապես ֆուտբոլային գերատեսչության ընտրած ճանապարհը՝ արդեն պարզ է։ Պարզ է, քանզի արդեն տեղ ենք ասել, ասել է թե՝ «Ну вот и приехали»: Ավելի վատ ուղղակի չի կարող լինել։
Անդրադառնանք նաև Գյումրիի «Շիրակին»։ Ի տարբերություն «Նոայի», «Ալաշկերտի» և «Արարատ-Արմենիայի»՝ վերջին տարիների ամենահայկական թիմի մեկնարկային կազմում ասպարեզ դուրս եկան միանգամից 7 տեղացի ֆուտբոլիստներ։ Ի դեմս «Շիրակի»՝ երեկ տեսանք բոլորովին այլ որակի ֆուտբոլ։ Հաշվի առնենք նաև, որ «Ստյաուան» կարգով միանգամայն գերազանցում է թե՛ «Կայրաթին» և թե՛ «Ռենովային»։ «Շիրակի» ֆուտբոլիստները առանձնակի նվիրումով պայքարեցին մինչև վերջ՝ գիտակցելով, որ ներկայացնում են Հայաստան պետությունը։ Եթե չլիներ հանդիպման գլխավոր մրցավարի, այսպես ասած, օդից նշանակված 11 մետրանոցը, ամենայն հավանականությամբ Բուխարեստում այլ արդյունք կգրանցվեր։ Ամեն դեպքում, ունենք այն, ինչ ունենք։
Լեգեոներներ հրավիրելը և նրանց նախապատվություն տալը ակումբների իրավունքն է, բայց… Այդ նույն ակումբներին, սակայն, կամա թե ակամա երկրպագում են ֆուտբոլասերները, երկրպագում է ցանկացած հայ։ Այդ թիմերի մասնակցությամբ հանդիպումները դիտում են հազարավոր պատանի ֆուտբոլիստներ, որոնք երազում են խաղալ եվրոպական մրցասպարեզում։ Եվ ինչ ապրումներ ունեցան ֆուտբոլով զբաղվող երեխաները՝ դիտելով նույն «Կայրաթ»-«Նոա» կամ «Ալաշկերտ»-«Ռենովա» հանդիպումները։ Պատասխանը, կարծում ենք, պարզ է։ Բանը հասել է նրան, որ առաջիկայում ստիպված ենք լինելու մեր երեխաներին թույլ չտալ դիտել վերոնշյալ թիմերի մասնակցությամբ հանդիպումները։ Հանդիպումներ, որոնք վտանգավոր են առողջության համար։
Պարտվելն ամենևին էլ ամոթ չէ, անպարտելիներ չկան։ Բայց, ինչպես ասում են, պարտություն էլ կա, պարտություն էլ։ Միանգամայն նախընտրելի կլիներ, որ «Նոան» կամ «Ալաշկերտը» պարտվեին հայ ֆուտբոլիստներով։ Գոնե մեր տղաները ֆուտբոլ կխաղային, կմասնակցեին միջազգային հանդիպման, փորձ ձեռք կբերեին… Հայաստանում հայ ֆուտբոլիստները ըստ էության զրկված են ֆուտբոլ խաղալու հնարավորությունից։ Ու փոխանակ մեր փառապանծ ֆուտբոլային գերատեսչությունը ճանապարհ բացի մերոնց համար, ազգային հավաքականը համալրում է անգուլոներով և ուդոներով։ Եթե կատարվածին հասարակությունը համարժեք արձագանք չտա, ապա մի քանի տարի անց չենք ունենա ազգային ասված հավաքականը, որը մեր երկրի գլխավոր ներկայացուցիչն է մեծ ֆուտբոլում։
Լուսանկարը՝ «Նոայի» ֆեյսբուքյան էջից