Հայ ազգային կոնգրեսի կենտրոնական գրասենյակի ներկայացուցիչ, «Հայկական ժամանակ» օրաթերթի գլխավոր խմբագիր Նիկոլ Փաշինյանը, ով այսօր հյուրընկալվել էր Մամուլի ազգային ակումբում, անդրադարձավ նաև Մարտի 1-ի գործի բացահայտման թեմային:
«Առաջին լրատվականը» Ն.Փաշինյանին հարց ուղղեց, Ս.Սարգսյանի` դատաիրավական բարեփոխումների շուրջ հրավիրած խորհրդակցության, Կոնգրեսի ևս մեկ պահանջի կատարման առիթով: Մարտի 1-ի գործով քննչական խմբի ղեկավար Վահագն Հարությունյանը արդեն մի քանի անգամ մամուլի ասուլիս է հրավիրել և ակնհայտ է, որ իշխանությունները դարձյալ զբաղված են բացահայտման իմիտացիայով և որևէ բացահայտում իրականացնելու նպատակ չունեն։
Ն.Փաշինյանին հարցրինք, թե Հայ ազգային կոնգրեսը քննարկու՞մ է Վահագն Հարությունյանի գործունեության հարցը, թե ինչպես պետք է արձագանքել նրա այդ մարտավարությանը:
«Երբ Հայ ազգային կոնգրեսը հասավ այն բանին, որ իշխանությունը պաշտոնապես արձանագրեց, որ Մարտի 1-ի էջը փակված չէ, դա չի նշանակում, որ Հայ ազգային կոնգրեսը ակնկալում էր, թե Վահագն Հարությունյանի քննչական խումբը բացահայտելու է Մարտի 1-ը: Այսօր խնդիրը դրված է, որ պաշտոնական մակարդակով արձանագրվեց, որ մենք այդտեղ ունենք բացահայտելու բազմաթիվ կետեր։ Սա արձանագրվեց: Ինչ վերաբերում է Վահագն Հարությունյանին և նրա քննչական խմբին, ապա որպեսզի բացահայտվի Մարտի 1-ը, նախ հարկավոր է բացահայտել Մարտի 1-ը չբացահայտելու հանցագործությունը: Այսինք, երբ տեղի է ունենում մի հանցագործություն, և դրանից հետո տեղի է ունենում հաջորդ հանցագործությունը, որի նպատակը առաջին հանցագործությունը կոծկելն է՝ պետք է նախ այդ կոծկման պրոցեսը բացահայտել, որից հետո հնարավոր կլինի բացահայտել Մարտի 1-ը: Մենք հույս ունենք և կարծում ենք, որ այնուամենայնիվ այսօր արդեն Մարտի 1-ի առկա քրեական գործում կան բազմաթիվ հիմքեր, որոնք իրական շանս են տալիս բացահայտելու ամբողջ տեղի ունեցածը: Իհարկե այսօրվա քննչական խումբը պետք է կրի պատասխանատվություն ոչ միայն Մարտի 1-ը չբացահայտելու համար, սակայն կոծկման պրոցեսի մաս էր նաև քաղբանտարկյալների առկայությունը: Բոլոր քաղբանտարկյալներին նույն Վահագն Հարությունյանն է մեղադրանք առաջադրել ու նրա քննչական խումբը, հետո դա դատախազությունն է հաստատել, դատարաններն են հաստատել: Այսինքն, այս ամբողջ պրոցեսը պետք է գնա մինչև վերջ: Բուն հանցագործությունը բացահայտելու համար պետք է նախ բացահայտել հանցագործությունը կոծկողներին և պարտակողներին»:
