Քրեական գործով մեղադրյալ Վահագն Աբգարյանին ՀՀ ԱՆ «Նուբարաշեն» քրեակատարողական հիմնարկում մարմնական վնասվածք պատճառելու դեպքի առթիվ հարուցված քրեական գործը և իրականացված քննությունը չի բավարարում Աբգարյանի պաշտպաններին։
Գործով ներգրավված իրավապաշտպան Մարինա Պողոսյանն «Առաջին լրատվական»-ի հետ զրույցում ասաց, որ դատախազությունն ու նախաքննական մարմինը ամեն ինչ անում են գործը այլ հունով տանելու, Վահագն Աբգարյանին քրեական հեղինակություն ներկայացնելու և Աբգարյանի գործում ներգրավված պաշտոնյաներին «մաքրելու» համար։ Բացի դրանից՝ իրավապաշտպանը համոզված է, որ եթե չլինեին դեպքի վերաբերյալ այլ իրավապաշտպանների կողմից բարձրաձայնումները, աղմուկը, դատախազությունը ոչ էլ ընթացք էր տալու գործին։
Նշենք, որ երեկ գլխավոր դատախազի խորհրդական Գոռ Աբրահամյանը ֆեյսբուքյան իր էջի միջոցով տեղեկացրեց, որ Վահագն Աբգարյանին ՀՀ ԱՆ «Նուբարաշեն» քրեակատարողական հիմնարկում մարմնական վնասվածք պատճառելու դեպքի առթիվ նախապատրաստված նյութերը ՀՀ գլխավոր դատախազության միջոցով ՀՀ Քրեական դատավարության օրենսգրքի 190-րդ հոդվածի 6-րդ մասով սահմանված կարգով ուղարկվել են ՀՀ հատուկ քննչական ծառայություն՝ հետագա ընթացքը լուծելու։ ՀՀ հատուկ քննչական ծառայության քննիչի 2020 թվականի մարտի 5-ի որոշմամբ՝ ՀՀ Քրեական օրենսգրքի 308-րդ հոդվածի 1-ին մասի հատկանիշներով հարուցվել է քրեական գործ: Կատարված նախաքննության արդյունքում պարզվել է, որ ՀՀ ԱՆ «Նուբարաշեն» քրեակատարողական հիմնարկի օրվա հերթափոխում ընդգրկված ծառայողները, խախտելով «Քրեակատարողական ծառայության մասին» ՀՀ օրենքի 24-րդ հոդվածի 1-ին մասի 1-ին և 4-րդ կետերով, ինչպես նաև «Հայաստանի Հանրապետության արդարադատության նախարարության քրեակատարողական ծառայության՝ կալանավորվածներին պահելու վայրերի և ուղղիչ հիմնարկների ներքին կանոնակարգը հաստատելու մասին» ՀՀ կառավարության որոշմամբ սահմանված պահանջները, 2020 թվականի փետրվարի 24-ին չարաշահել են իրենց պաշտոնեական լիազորությունները, որն էական վնաս է պատճառել «Նուբարաշեն» ՔԿՀ կալանավորված անձ Վ. Աբգարյանի իրավունքներին և օրինական շահերին: Մասնավորապես՝ 2020թ. փետրվարի 24-ի երեկոյան քրեակատարողական հիմնարկի համապատասխան ծառայողները Վ. Աբգարյանին հիմնարկի պետի մոտ ուղեկցելու պատրվակով դուրս են բերել իր խցից և ուղեկցել մեկ այլ խուց, որտեղ գտնվող դատապարտյալները վիճաբանել են նրա հետ և հարվածներ հասցրել վերջինիս մարմնի տարբեր մասերին՝ պատճառելով առողջությանը թեթև վնասի հատկանիշներ պարունակող, ինչպես նաև առողջությանը թեթև վնասի հատկանիշներ չպարունակող մարմնական վնասվածքներ: 2020 թվականի օգոստոսի 26-ին ՀՀ Քրեական օրենսգրքի 308-րդ հոդվածի 1-ին մասով նախատեսված հանցագործությունը կատարելու կասկածանքով ձերբակալվել է քրեակատարողական ծառայության երկու աշխատակից։
«Դատախազությունն իր բարձունքի վրա է։ Ինչ ասեմ։ Բայց կարող եմ ասել, որ եթե չլինեին իրավապաշտպաններ Ժաննա Ալեքսանյանի, Արթուր Սաքունցի կողմից ՔԿՀ-ում դատապարտյալների նկատմամբ ոչ համաչափ ուժի կիրառման մասին բարձրաձայնումները, ապա այդ արձագանքն էլ չէր լինի։ Բայց երբ քրեական ենթամշակույթի դեմ պայքարի անվան տակ 20 հոգով մտնում են ու հարձակվում են մարդկանց վրա, սա քրեական ենթամշակույթի դեմ պայքար չէ։ Նույնը ամիսներ առաջ եղել էր Վահագն Աբգարյանի հետ, ու իրավապաշտպանները փաստացի այդ դեպքերը կապել էին իրար հետ։ Ուշագրավ է, որ Վահագն Աբգարյանի դեպքը եղել էր փետրվարին, բայց առ այսօր քրեական գործ չէր հարուցվել մինչև այն պահը, երբ իրավապաշտպանները չխոսեցին դրա մասին։ Ծածկադմբոց էր գնում»,-ասաց Պողոսյանը։
Իրավապաշտպանն, անդրադառնալով կոնկրետ գործին, նկատեց, որ գլխավոր դատախազի խորհրդականի էջում դեպքի նկարագրությունը աղավաղված է։ Այնտեղ ճշմարտությունը աղավաղված է, և փորձ է արվել կատարվածը տանել գոյություն չունեցող, կլանային պատերազմի դաշտ, որի ենթատեքստը իրենց համար հասկանալի և ընկալելի է։ «Քանի որ իրենք անընդհատ փորձում են Վահագն Աբգարյանին քրեական ենթամշակույթի կրող ներկայացնել, դրա համար էլ փորձում են ցույց տալ, որ Վահագին այլ խուց են տեղափոխել, ու այնտեղ վիճաբանություն է եղել։ Սա բացարձակ սուտ է։ Վահագն Աբգարյանի հետ միջադեպը եղել է ոչ թե մեկ այլ խցում, այլ օպերատիվ գծով ռեժիմի պետի առանձնասենյակում։ Իսկ փորձելով նկարագրել, թե միջադեպը եղել է խցում, դրանով փորձ են անում մեղքը պաշտոնյաների վրայից տեղափոխել դեպի կալանավորվածների միջև միջանձնային հարաբերություններ, որի ենթատեքստը մեզ համար հասկանալի է»,-ասաց տիկին Պողոսյանը։
Նրա խոսքերով՝ կատարվածից 6-7 ամիս անց հնարավոր չէ հասկանալ, որ եթե տեղազննություն չի կատարվել, արյան հետքերը չեն վերցվել, շտապօգնություն չի կանչվել այն դեպքում, երբ Վահագն Աբգարյանը արյան մեծ չափի կորուստ է ունեցել։ «ՔԿՀ պետը, լինելով այնտեղ, սպասել է, որ պատվերը կատարվեր, որից հետո գնացել է տուն։ Ես սա ենթադրում եմ։ Փաստացի տեղազննում չի կատարվել, չեն առգրավվել Վահագի արյունոտ շորերը և այլ գործողություններ։ Բայց հիմա փորձ են անում կատարվածը բերել այլ հարթություն՝ իբր Վահագն Աբգարյանը քրեական հեղինակություն է, այլ խուց են տեղափոխել, ծեծ է եղել։ Բայց ծեծ չի եղել, այլ եղել է մահափորձ, որը ձեռքով չի կատարվել։ Մնացածը չեմ մանրամասնում, թող նախաքննությունը պարզի, թե ինչով է եղել ու ինչու է փորձ արվում կատարվածը ներկայացնել իբր կալանավորների ներքին կոնֆլիկտի արդյունք։ Կրկնում եմ՝ չի եղել նման բան։ Եղել է մահափորձի պատվեր, որը կատարվել է ՔԿՀ պաշտոնատար անձանց կողմից»,- ընդգծեց Պողոսյանը՝ հավելելով, որ քննության ներկայիս ընթացքը իրենց չի բավարարում, և իրենք հասնելու են նրան, որ ՔԿՀ այդ երկու աշխատակիցներից պետք է ՔԿՀ պաշտոնյաներ ներգրավված լինեն ու պատասխանատվության ենթարկվեն։ «Բայց դրան հասնելու համար էլ նախաքննական մարմինը նախ պետք է պարզի, թե մահափորձն ինչով է եղել, դա ոնց է մտել քրեակատարողական հիմնարկ, և ոնց է պատահում, որ դա լինում է ռեժիմի պետի սենյակում։ Թող դատախազությունը այս հարցերի պատասխանները տա, ոչ թե Արթուր Դավթյանի սցենարով սյուժեներ գրի»,- եզրափակեց Մարինա Պողոսյանը։
