«Այդ ձևական հայցերը, որոնք ներկայացվում են տարբեր սուբյեկտների դեմ, միայն մեկ նպատակ են հետապնդում՝ Մարտի 1-ի գործից հանրության ուշադրությունը շեղել։ Քոչարյանն ու իր փաստաբանական թիմը կարող են այնքան գործ տալ, այնքան հայցադիմում ներկայացնել, որ իրենց ստեղծած համակարգը այլևս չկարողանա դիմանալ այդ հայցադիմումների տարափին»,- «Առաջին լրատվական»-ի հետ զրույցում ասաց Մարտի 1-ի գործով տուժողների իրավահաջորդների ներկայացուցիչ Սեդա Սաֆարյանը՝ անդրադառնալով Ռոբերտ Քոչարյանի ներկայացրած հայցադիմումին ընդդեմ ՀՀ-ի։
Հիշեցնենք, որ նախօրեին պարզ դարձավ, որ Ռոբերտ Քոչարյանը դատական հայց է ներկայացրել ընդդեմ Հայաստանի Հանրապետության և հօգուտ իրեն փոխանցել 2 միլիոն դրամ: Հայցի առարկա է հանդիսացել այն, որ Մարտի 1-ի գործը քննող դատավոր Աննա Դանիբեկյանը Քոչարյանի առողջական վիճակի վերաբերյալ առանց իր թույլտվության տվյալներ է հրապարակել։ Այդ տվյալները դատավոր Աննա Դանիբեկյանը մարտի 10-ի դատական նիստին էր հրապարակել՝ ներկայացնելով «Էրեբունի» բժշկական կենտրոնից ստացված տեղեկանքը։ Քոչարյանն ու իր փաստաբանները պնդում են, որ դատավոր Աննա Դանիբեկյանը խախտել է Եվրոպական կոնվենցիայի 8-րդ հոդվածը՝ հրապարակելով առողջական գաղտնիք։
«Բաց դատական նիստի ժամանակ, հրապարակային դատաքննության ժամանակ չեն կարող լինել փակ փաստաթղթեր։ Կողմերը ազատ են դատավարության ժամանակ ներկայացված փաստաթղթերից օգտվելու։ Բացի դրանից, այդ բոլոր փաստաթղթերը տեղ են գտնում դատական ակտերում։ Իրենց արածն անհեթեթություն է, քանի որ, եթե դու ասում ես, որ հիվանդ ես, պետք է նաև ասես, թե ինչ հիվանդ ես, ու այդ ապացույցը պետք է հետազոտվի։ Իսկ ապացույցի հետազոտումը չի ենթադրում մտքում կարդալ։ Դա նշանակում է, որ այդ ապացույցի վերաբերյալ կողմերը կարող են դատավարության ժամանակ կարծիք հայտնել, անհամաձայնություն ունենալ ախտորոշման հետ կապված։ Ով ասաց, որ իրենց կողմից մատնանշվածը բժշկական գաղտնիք է։ Բժշկական գաղտնիք է այն, որ կողմնակի անձն է առողջության վերաբերյալ տեղեկություններ պահանջում։ Ինչ վերաբերում է դատավարության ժամանակ այս կամ այն փաստաթղթի, տեղեկանքի ուսումնասիրմանը, ապա դա չի կարող գաղտնիք համարվել։ Նորույթներ են ուզում մտցնել, ինչ ասեմ»,- ասաց Սաֆարյանը՝ հավելելով, որ դրա փոխարեն Քոչարյանը լավ կանի՝ խոսի Մարտի 1-ից։ «Քոչարյանի հիվանդությունները ոչ մեկին չեն հետաքրքրում։ Քոչարյանը ոչ էլ հիվանդ է։ Հանրությանը հետաքրքրում է բացառապես Մարտի 1-ի ողբերգությունը և դրա բացահայտումը»,- ընդգծեց Սաֆարյանը՝ հավելելով, որ եթե Աննա Դանիբեկյանը մի քիչ տեմպով լսեր այս գործը՝ ոչ իրեն դատի կտային, ոչ էլ գործն այսպես կդոփեր տեղում։ «Ես միայն մի բան եմ տեսնում, որ առերևույթ ինչ-որ բան քողարկելու համար Քոչարյանն ու իր փաստաբանները անընդհատ դատական հայցեր են ներկայացնում։ Օրինակ՝ իրենք վերաքննիչ բողոքից հրաժարվել են, հայցը թողնվել է առանց քննության, բայց իրենք բողոք են բերել նաև իրենց իսկ կողմից հրաժարված գործով հայցն առանց քննության թողնելու որոշման դեմ։ Իսկ դա արել են, որպեսզի հարց չառաջանա, թե ինչպես եղավ, որ նույն ակտի դեմ բերվեց չորս բողոք, և դրանցից երկուսը մակագրվեց դատավոր Արմեն Դանիելյանին, իսկ երկուսը՝ իրենց նախընտրելի՝ դատավոր Նիկողոսյանին։ Պարզապես պետք է խորանալ այդ ամենի մեջ ու կտեսնես, թե իրենց բերած բողոքները, հայցադիմումները ինչի համար են՝ ում են ուզում պաշտպանել, և այդ պահին իրենց համար ինչն է կարևոր։ Սա է խնդիրը։ Ուրիշ ոչինչ»,- եզրափակեց Սեդա Սաֆարյանը։