Իսրայելն օդային հարվածներ է հասցրել Լիբանանի հետ սահմանին գտնվող շիական «Հեզբոլլահ» կազմակերպության դիտակետերին: Սա պատասխան հարված էր կրակոցներին: Տեղեկատվությունը հրապարակված է իսրայելական բանակի Twitter-ում:
«Անցած գիշեր Իսրայելի հյուսիսում գործողության իրականացման ժամանակ Լիբանանի կողմից կրակ է բացվել իսրայելական ուժերի վրա: Մենք պատասխան կրակ ենք բացել, իսկ մեր թռչող սարքերը հարվածել են սահմանին մոտ գտնվող «Հեզբոլլահ»-ի դիտակետերին,-ասվում է հայտարարության մեջ:
Նախօրեին Իսրայելը փշալարերով անցուղի է հայտնաբերել Լիբանանի հետ սահմանին: Դրանից հետո հետախուզվել է Մանարա բնակավայրի շրջակայքը՝ «Հեզբոլլահ»-ի մարտիկների ներթափանցման հնարավորությունը պարզելու նպատակով:
Իսրայելի կողմից լուսային հրթիռներ են արձակվել լիբանանյան Հոուլա և Մեյս-էլ-Ջեբել բնակավայրերի ուղղությամբ՝ թշնամու ուժերի հնարավոր ներկայությունը գնահատելու համար:
Նախօրեին Իսրայելը հարվածներ է հասցրել Գազայի հատվածում գտնվող ՀԱՄԱՍ-ի օբյեկտներին: Հարձակումը սկսվել է ի պատասխան պայթուցիկներով օդապարիկների բաց թողնմանը: Նախկինում երկար ժամանակ կողմերի միջև ռազմական գործողություն տեղի չէր ունեցել, օդապարիկների բաց թողնումը սկսվել է օգոստոսին, ինչին հետևել են իսրայելական բանակի կողմից հրետակոծումները: