ԱՄՆ-ի նախագահ Դոնալդ Թրամփը կարծում է, որ նոյեմբերին կայանալիք նախագահական ընտրություններում հաղթանակի դեպքում Իրանի հետ համաձայնությունների կհասնի մոտավորապես երեք շաբաթվա ընթացքում: Այդ մասին նա հայտարարել է Fox News հեռուստաալիքի լրարգողներին տված հարցազրույցում, որը եթեր է դուրս եկել օգոստոսի 23-ին: Պատմելով, թե ինքն ինչ ուղեգիծ կվարի վերընտրվելու դեպքում, նա նշել է. «Իրանի հետ գործարք կկնքեմ առաջին երեք շաբաթվա ընթացքում»:
«Նրանք պարզապես սպասում են: Նրանք սաստիկ ցանկանում են գործարք կնքել,- հավելել է Թրամփը:- Նրանք ցանկանում են հասկանալ, թե ինչ կլինի»: «Բայց եթե հաղթի (դեմոկրատների թեկնածու Ջոզեֆ) Բայդենը, ապա նրանք կկնքեն ևս մեկ նույնպիսի գործարք, ինչպս Ջոն Քերիի հետ, որն անիրազեկ է, Բարաք Օբամայի հետ, որը, ճիշտն ասած, այն ինչ վերաբերում է գործարքներ կնքելուն, անիրազեկ է»,- ասել է Միացյալ Նահանգների ղեկավարը:
Իրանը և ՄԱԿ-ի Անվտանգության խորհրդի մշտական անդամները (Ռուսաստան, Մեծ Բրիտանիա, Չինաստան, ԱՄՆ, Ֆրանսիա), ինչպես նաև Գերմանիան 2015 թվականին մշակեցին Գործողությունների համատեղ համապարփակ պլանը (ԳՀՀՊ), որը սահմանափակում էր Թեհրանի միջուկային մշակումները՝ ՄԱԿ-ի պատժամիջոցների և ԱՄՆ-ի և ԵՄ-ի միակողմանի սահմանափակիչ միջոցների վերացման փոխարեն:
Այն ժամանակ ԱՄՆ-ի նախագահը դեմոկրատ Օբաման էր, պետքարտուղարը՝ Քերին: 2018 թվականի մայիսին Թրամփի վարչակազմը հայտարարեց ԳՀՀՊ-ից ԱՄՆ-ի դուրս գալու մասին և Իրանի դեմ տնտեսական պատժամիջոցներ սահմանեց:
Թրամփը բազմիցս պնդել է, որ պատրաստ է վերսկսելու երկխոսությունն Իրանի իշխանությունների հետ: Նրա խոսքով՝ Վաշինգտոնը շահագրգռված է ԳՀՀՊ-ն փոխարինելու մի այլ պայմանագրով, որն ընդգրկեր ոչ միայն Իրանի միջուկային ծրագիրը, այլև լայն սպեկտրի այլ հարցեր, ներառյալ Թեհրանի հրթիռային ծրագիրը և նրա տարածաշրջանային քաղաքականությունը։