Նաթանզի միջուկային կառույցում տեղի ունեցած հրդեհը սաբոտաժ է եղել, հայտարարել է Իրանի ատոմային էներգիայի կազմակերպության պաշտոնական ներկայացուցիչ Բեհրուզ Քամալվանդին։
«Անցկացված ստուգումները հաստատել են, որ սա սաբոտաժ է եղել»,- կազմակերպության ներկայացուցչի խոսքերն է մեջբերում Al-Aram հեռուստաալիքը։
Իրանի ատոմային էներգիայի կազմակերպությունը հուլիսին հաղորդել էր Նաթանզում գտնվող ուրանի հարստացման գծով ձեռնարկություններից մեկում տեղի ունեցած հրդեհի մասին։ Ըստ տեղի պաշտոնական աղբյուրների` կային նյութական խոշոր վնասներ, բայց ոչ զոհեր:
ԶԼՄ-ներում տեղեկություններ էին տարածվել, որ սա պայթյուն է եղել, որը կարող էր Իսրայելի դիվերսիան լինել։ Իրանական իշխանություններն այս վարկածը ոչ հաստատել էին, ոչ հերքել, նշելով, որ մամուլը փորձում է «իսրայելական ռեժիմի ուժեղ կերպար» ստեղծել և խոստացել էին պատճառների մասին բարձրաձայնել ավելի ուշ։
